Júrdek poıyz elordaǵa áp-sátte jetkizdi. Qosymsha tirkelgen vagondar kirse, shyqqysyz. Kórmege jetýdiń barlyq jaǵdaıy qarastyrylǵan. Astana burynǵydan da ajarlana túsken. Bir kún boıy aıaǵymyz talǵansha pavılondardy aralap, ómir boıy umytylmaıtyndaı áserge bólendik. Meni shetelden kelgen azamattardyń, týrısterdiń, qazaqstandyq jastardyń kóptigi tańǵaldyrdy. Bir ret tamashalaý arqyly ǵana jańashyl ınnovasııalyq múmkindikterdiń sheksizdigine kóz jetkizdim.
Taǵy bir aıta ketetin jaıt, uıymdastyrý jumystarynyń óte joǵary deńgeıde ekendigi. Ásirese, qaýipsizdik qyzmetine joǵary baǵa berer edim. Kórmege kelýshilerdiń biri balalardyń qolarbasyn joǵaltyp aldy. Atshaptyrym pavılon ishinen lezde taýyp berdi. Sanıtarlyq toraptar tazalyǵy da talapqa saı. Túrli ulttyq meıramhanalar jumys istep tur. Bir sózben aıtqanda, kórme aıasyndaǵy qyzmet kórsetý sapasynda min joq. Osyndaı aıtýly sharanyń elimizde abyroımen ótip jatqany keýdege maqtanysh sezimin uıalatady.
Halyqaralyq kórmeden balalarymnyń alǵan áseri sheksiz.
Aıgúl MIRHAMIDOVA,
kirister bóliminiń bas mamany
Soltústik Qazaqstan oblysy,
Ǵ.Músirepov aýdany
