6 tamyzda bastalyp, 12-si kúni máresine jetetin bul bedeldi básekede bıyl alty komanda kúsh synasýda. Atap aıtqanda, olar – «Avangard» (Omby), «Admıral» (Vladıvostok), «Davos» (Shveısarııa), «Neftehımık» (Nıjnekamsk), «Traktor» (Chelıabınsk) hokkeı klýbtary jáne Astananyń «Barys» komandasy. «Davostan» basqasynyń bári de Qurlyqtyq hokkeı lıgasynda oınaıtyn qabyrǵaly klýbtar. Demek, munyń ózi segizinshi márte uıymdastyrylyp otyrǵan bul jarystyń abyroıyn asqaqtatyp, mártebesin kótere túsetini sózsiz.
Astananyń «Barys» hokkeı klýby bul týrnırge basynan bastap qatysyp keledi. 2010 jyly tuńǵysh uıymdastyrylǵan jarysta elorda hokkeıshileri tamasha óner kórsetip, top jardy. Fınaldyq matchta olar Mınskiniń «Dınamosyn» býllıt boıynsha jeńgen bolatyn.
Barys» bul tabysyn kelesi jyly ótken týrnırde taǵy da qaıtalady. Bul joly komanda fınalda Hanty-Mansııskiden kelgen «Iýgra» hokkeı klýbynan basym túsip, týrnırdiń eki dúrkin jeńimpazy atandy.
Úshinshi ret uıymdastyrylǵan týrnırde Astana hokkeıshileri sheshýshi oıynda SKA (Sankt-Peterbýrg) komandasyna ese jiberip, kúmis júldeni qanaǵat tutty. Al qola júldeni taǵy bir qazaqstandyq klýb – О́skemenniń «Torpedosy» ıelengen bolatyn.
2014 jyly «Barys» osy týrnırde qaıtadan top jardy. Ol kezde úzdik úshtik bylaısha túzilgen bolatyn: 1. «Barys» (Astana), 2. «Iýgra» (Hanty-Mansıısk), 3. «Amýr» (Habarov). Araǵa jyl salyp ótken týrnırde Qazaqstannyń basty klýby óziniń chempıondyq ataǵyn saqtaı almady. «Barys» Prezıdent kýbogy synynyń fınalynda Ombynyń «Avangardynan» 3:5 esebimen jeńilip qaldy.
2015 jyly altynshy márte ótken týrnırdiń ereksheligi zor boldy. Hokkeı tartysy sý jańa sport saraıy – «Barys Arena» muz aıdynynda ótti. Onyń ústine, bul dúbirli dodanyń ashylý saltanatyna Memleket basshysy Nursultan Ábishuly Nazarbaevtyń ózi qatysqan bolatyn.
Bul jolǵy týrnırdiń fınalynda «Barys» pen «Admıral» (Omby) hokkeıshileri taǵy da ımek taıaq túıistirdi. О́te tartysty ótken oıynnyń negizgi ýaqyty 2:2 esebimen aıaqtalyp, komandalar matchty over-taımda jalǵastyrýǵa májbúr boldy. Sol oıynda kýboktyń taǵdyryn sheshken jalǵyz shaıbany Talǵat Jaılaýov soǵyp, óziniń komandasyna jeńis syılaǵan bolatyn.
Byltyrǵy ótken týrnır de este qalar epızodtarǵa toly boldy. Mysaly, «Barys» pen Qytaıdyń «Kýn Lýn Red Star» hokkeı klýby arasyndaǵy match jappaı tóbeleske ulasyp, oıyn aıaqtalmaı qalǵan bolatyn. Degenmen, bul kıkiljiń týrnırdiń bedeline kir juqtyra almady. «Er shekispeı bekispeıdi» demekshi, komandalar tártibin túzep, kelesi oıyndarda táp-táýir nátıjelerge qol jetkizdi. Al týrnırdiń jeńimpazyn anyqtaǵan sheshýshi kezdesýde «Barys» pen Novokýzneskiniń «Metallýrg» komandasy kúsh synasty. Oıynnyń negizgi ýaqyty 1:1 esebimen aıaqtalyp, odan keıin hokkeıshilerge over-taımda da ter tógýge týra keldi. Munda da esep ózgermeı, kezek býllıtke de kelip jetken. Bul básekede «Metallýrgtiń» shabýylshysy Ivan Emes mergendik tanytyp, «Barystyń» jankúıerlerin jerge qaratqan bolatyn.
Bıylǵy týrnırge «Barys» ádettegideı tyńǵylyqty daıyndyqpen keldi. Alǵashqy týrda komanda shveısarııalyq «Davospen» kúsh synasyp, 4:2 esebimen jeńdi. О́kinishke qaraı, ekinshi oıynda jerlesterimiz «Neftehımık» komandasyna 1:2 esebimen ese jiberip aldy. Keshe Evgenıı Koreshkovtyń shákirtteri «Avangardpen» muz aıdynyna shyqty.
«Barys» kelesi kezdesýin 11 tamyz kúni «Traktor» komandasymen ótkizedi.
Qaırat ÁBILDA,
«Egemen Qazaqstan»
