Saltanatty sharanyń resmı bóliminde Qazaqstannyń Ulttyq ekonomıka mınıstri Tımýr Súleımenov qazaq-túrik dostastyǵynyń jetistikterin áńgimelep, túrkııalyqtarǵa halyqaralyq sharanyń Astanada ótýine qoldaý bildirgenderi úshin alǵysyn bildirdi.
Basqosýda Túrkııa Respýblıkasynyń Ekonomıka mınıstri Nıhat Zeıbekdjı sóz sóılep, eki el arasyndaǵy yntymaqtastyq pen baýyrlastyqtyń búgingi tańda úlken saıası ári ekonomıkalyq qarym-qatynasqa aınalǵanyn tilge tıek etti.
Ulttyq kúnniń sánin keltirgen «Mehteran» Túrik áskerı orkestriniń sherýi EKSPO qonaqtarynyń esinde uzaq saqtalary sózsiz. Sonymen qatar, kórermenderge myńdaǵan gúl shoqtary men Túrkııa jalaýshalary berilip, pavılon tamashalaýshylarǵa ulttyq taǵamdar usynyldy.
Túrkııa pavılony eki aıda 400 myńnan asa kórermen qabyldap úlgergen.
Alpys myńǵa jýyq jetkinshek Astanany kórdi
Ortalyq kommýnıkasııalar qyzmetinde baspasóz máslıhaty ótip, Astana qalalyq bilim basqarmasy kámeletke tolmaǵandardyń quqyqtaryn qorǵaý bóliminiń basshysy Lázzat Orynbasarova jýrnalısterdiń saýaldaryna jaýap berdi.
Ol EKSPO-2017 kórmesine Qazaqstannyń óńirlerinen 80 myńǵa jýyq oqýshy keletinin málimdedi. Búginge deıin 57 913 jetkinshek elordaǵa taban tirep, halyqaralyq sharany tamashalap úlgergen.
«Endi kórme aıaqtalǵanǵa deıin 15-20 myń oqýshy keledi dep kútilýde. Bilim basqarmasy balalardy qarsy alý, úılerine shyǵaryp salý, eki kúndik ystyq tamaqpen, jataqhanamen qamtamasyz etý sharalaryn qamtyp otyr», degen L.Orynbasarova kórme bastalǵaly balalarǵa qatysty eshqandaı tótenshe jaǵdaı oryn almaǵanyn málimdedi. Aımaqtardan kelgen balalar úshin Astanada eki kúndik baǵdarlama qarastyrylǵan. Oqýshylar birinshi kúnin EKSPO kórmesimen tanysýǵa arnasa, ekinshi kúninde elordanyń ásem jerlerin aralaıdy.
Qazaqstan-Belarýs bıznesiniń belesi
Belarýs – ózender men kólderge baı dástúrli memleket. Onda sý elektr stansalaryn salý boıynsha arnaıy baǵdarlama da ázirlengen. Ortasha eseppen eki jylda bir sý elektr stansasy paıdalanýǵa beriledi. Respýblıkada jańǵyrmaly energııanyń ózge de túrlerin zertteý jáne engizý jumystary júrgizilýde, suıyq jáne kógildir otyn shyǵarylady. Memlekettiń jel resýrstary da jetkilikti, soltústik-batys aımaqtarynda jel energııasyn óndiretin baǵandar ornatylǵan.
Bul málimetterdi Belarýs Respýblıkasynyń ulttyq kúnine oraı uıymdastyrylǵan baspasóz máslıhatynda osy eldiń Qazaqstandaǵy Tótenshe jáne ókiletti elshisi Anatolıı Nıchkasov jetkizdi. Onda JEK damytýdan basqa atom elektrstansasyn qurý jobasy júzege asyrylýda. 2020 jylǵa qaraı bul tolyq rejimde jumys istemek. AES qurylysy MAGATE-niń talaptary men erejelerine saı júrgizilýde. «Atom elektr stansasynyń qurylysy barysynda eń sońǵy úlgidegi reaktor paıdalanylýda, onyń úsh deńgeıli qaýipsizdik júıesi bar», dedi ol.
Elshi eki el arasyndaǵy yntymaqtastyqqa shırek ǵasyr tolǵanyn áńgimelep, saıası dıalog tyǵyz saýda-ekonomıkalyq baılanysqa ulasqanyn aıtty. «Bizdiń kásipkerler baılanysty keńeıtip, birlesken kásiporyndar qurdy. Búgingi tańda Qazaqstanda Belarýspen birlesken 15 kásiporyn bar. Olardyń kópshiligi aýyl sharýashylyǵy, mashına jasaý salalarynda jumys isteýde. 25 jylda eki el arasyndaǵy saýda aınalymy 10 esege artqan. Keden odaǵy, EýrAzEQ syndy jańa ınstıtýttar quryldy. Munyń barlyǵy asa mańyzdy mánge ıe», dedi Anatolıı Nıchkasov.
13-15 tamyz kúnderi elordada Belarýs óndirýshileriniń «Made in Belarus. Astana» kórmesi ótpek. «Bul shara sońǵy jyldary uıymdastyrylǵan kórmelerdiń ishindegi eń aýqymdysy bolmaq. Onda mashına qurastyrý, munaı-hımııa, kólik jáne logıstıka, aýyl sharýashylyǵy jáne azyq-túlik ónimderi, aǵash óńdeý jáne jeńil ónerkásip, kosmetıka jáne ózge de tutyný taýarlary boıynsha 70-ten astam belarýstik kásiporyn ónimderi men jańa dúnıelerin kórsetedi.
Bul kórme qazaqstandyq-belarýstik bıznestiń damýyna arnalǵan yńǵaıly ári tıimdi platformaǵa aınalary sózsiz», dedi basqosýda Belarýs saýda-ónerkásiptik palatasy «Belınterekspo» ýnıtarly kórme kásipornynyń dırektory Evgenıı Vvedenskıı. Onyń aıtýynsha, respýblıkanyń óndiris alyptary Qazaqstanǵa birqatar qyzyqty zamanaýı ónimder ákelmek. Máselen, «Gomselmash» AQ Belarýs pen Qazaqstan birlesip ázirlegen «Essil KZS-760» astyq jınaý kombaınyn usynady. Bul tehnıka ylǵaldylyǵy joǵary dánderdi de tıimdi jınaı alady. Mınsk avtokólik zaýyty ekologııalyq Eýro-4 deńgeıli qozǵaltqyshy bar tolyq jetekti tartqysh kólik pen «MAZ-103» avtobýsyn tanystyrady. Mınsk traktor zaýyty navıgasııalyq júıelermen jabdyqtalǵan mol qýatty «Belarus-3522», «Belarus-4522» traktorlaryn ákeledi. «BelTRANSNET» bilim berý ortalyǵy bolashaq kóligi atanǵan «Sky Way» jańa estakadalyq kóligin usynady eken.
13 tamyz kúni EKSPO-2017 halyqaralyq mamandandyrylǵan kórmesindegi Belarýs Respýblıkasynyń ulttyq kúni ótedi. Memlekettiń premer-mınıstri Andreı Kobıakov bastaǵan delegasııa qatysatyn shara Qazaqstan-Belarýs bıznes-forýmymen jalǵasady.
Toptamany ázirlegen:
Ashat RAIQUL,
«Egemen Qazaqstan»
Sýretterdi túsirgen
Orynbaı BALMURAT,
«Egemen Qazaqstan»
