Elbasy Nursultan Nazarbaev Qazaqstan halqyna arnalǵan «Nurly jol – bolashaqqa bastar jol» atty Joldaýynda jol – ekonomıkalyq damýdyń kúretamyry ekendigin taǵy da eske salǵan edi. «Eldiń órkenin bilgiń kelse, jolyna qara» degen qaǵıda qalyptasqan. Barys-kelis pen alys-beriste jol qatynasy aıryqsha mańyzǵa ıe. Kóne zamandarda iri qalalarymyzdyń kóbi Uly Jibek jolyn jaǵalaı qonys tepken» deı kelip, búgingi básekege qurylǵan naryq zamanynda da joldyń mańyzy erekshe ekendigin, «jol − shyn máninde ómirdiń ózegi, baqýatty tirliktiń qaınar kózi. Barlyq aımaqtar temir jolmen, tas jolmen, áýe jolymen ózara tyǵyz baılanysýy kerektigin», aıtady. Sondyqtan Elbasy joldardyń sapasyn kóterýdi, onyń boıyndaǵy logıstıkalyq qyzmetterdi damytýdy únemi tapsyryp otyrady. Qostanaıda ótken semınarda jol sapasyn kóterýge arnaldy. Investısııalyq jobany daıyndaý jumystaryna qatysyp otyrǵan Qazaqstan jol ǵylymı-zertteý ınstıtýty respýblıkalyq mańyzy bar joldardy jóndeý men kútip ustaýdyń ozyq ádisterin óndiriske engizýdi usyndy.
– Respýblıkalyq mańyzy bar joldardy kútip-baptaýdyń biz usynyp otyrǵan ádistemesi AQSh-ta, Eýropanyń birqatar damyǵan elderinde paıdalanylady. Osy ádistemeni paıdalanatyn joba júzege asyrylǵanda joldyń kútimine bólinetin qarjy 22 paıyzǵa deıin únemdeledi. Ozyq tájirıbeni aldymen Qostanaı oblysyndaǵy respýblıkalyq mańyzy bar joldardy jóndeý, kútý jumystaryna engizemiz, – deıdi «Qazaqstan jol ǵylymı-zertteý ınstıtýty» AQ vıse-prezıdenti Erbol Aıtbaev.
Usynyp otyrǵan ádistemesin jasaý úshin ǵylymı-zertteý ınstıtýtynyń jol synaý jáne jyljymaly jol dıagnostıkalaý zerthanalary Qostanaı oblysyndaǵy 1409 shaqyrymǵa sozylatyn respýblıkalyq mańyzy bar joldardy tegis júrip ótip, qajetti málimetterdiń barlyǵyn jınady. Zerthanalardaǵy zamanaýı quraldar arqyly joldardyń qozǵalys qarqyndylyǵy esepke alynady, kópirler men sý ótkizý qubyrlaryn ınventarızasııalaý jáne dıagnostıkalaý, avtomobıl joldaryn pasporttaý júzege asyrylady, jol aqaýlary týraly málimetter jınalyp, óńdeledi, jol jamyl-
ǵysynyń serpindilik modýli, jamylǵynyń ilinisý qasıeti, jalpy tas joldardyń búgingi jaǵdaıy búge-shigesine deıin anyqtalady. Semınarda merdiger kompanııalar ókilderine qanatqaqty jobanyń osyndaı jumystary tanystyrylyp, túsindirildi, múddeli jaq taraptary talqylady.
Qazaqstan jol ǵylymı-zertteý ınstıtýty búginde joldardyń jaǵdaıyna qatysty jyljymaly keshendi zerthana jınaǵan qajetti málimetterdiń barlyǵyn óńdep, jóndeý, kútý jumystarynyń smetalyq qunyn daıyndaý ústinde. Joba boıynsha respýblıkalyq mańyzdy jol kóleminiń 700 shaqyrymyn tender arqyly alatyn merdiger kompanııalar kelesi jyldyń basynan bastap, jóndeýge, kútý jumystaryn júrgizýge kirisedi.
– «Avtomobıl joldaryn kútip-baptaý turaqtylyǵy» jobasy segiz jylǵa arnalǵan. Joba boıynsha merdiger kompanııalar úsh jyl joldy jóndep, qalǵan bes jylda onyń kútimin júzege asyrady. Bul joba joldyń sapaly jasalýyna da, kútimine de, sonymen qatar merdiger kompanııalardyń alańsyz jumys isteýine de tıimdi bolady, – deıdi «QazAvtoJol» AQ Qostanaı oblystyq fılıaly dırektorynyń orynbasary Nurbek Temirhanov.
«QazjolǴZI» AQ qyzmetkerleri semınarǵa qatysýshylarǵa jyljymaly jol zerthanalary men qurylǵylardyń jumysyn kórsetip, tanystyrdy.
Názıra JÁRIMBET,
«Egemen Qazaqstan»
QOSTANAI
