Kóptiń kóńilin terbegen kesh qyzyqtylyǵymen erekshelener edi. Onyń ón boıynda Abaı Qunanbaev shyǵarmalaryn nasıhattaý arqyly memlekettik tildiń mártebesin kóterý, qazaq mádenıeti, ádebıetine degen ózge ult ókilderiniń yqylasyn arttyrý, qazaqstandyq rýhanı birlikti qýattaý turdy.
Aǵymdaǵy jyldyń tamyz aıynyń birinshi juldyzynda irikteý kezeńine 25 úmitker qatysyp, 12 ónerpaz qorytyndy kezeńge joldama alǵan bolatyn. Uly aqynnyń týǵan kúninde ótetin Almaty qalalyq «Abaı oqýlary» festıvaline úmitkerler 3 joldamany jeńip aldy. Báıge qorytyndysy boıynsha tórt tildi erkin meńgergen, ekstremal sport túri − taýǵa órmeleýden Qazaqstan Respýblıkasynyń chempıony, Londonnyń Reddıng ýnıversıtetiniń túlegi Seıtjan Kenjeǵul jeńimpaz atandy. Ol Iran-Ǵaıyptyń «Men ishpegen ý bar ma?» atty pesasynan úzindi oryndady. Ekinshi orynǵa Abaıdyń «Kóktem» atty óleńin oqyǵan orys ultynyń ókili Galına Hmyrova kóterildi.
Úshinshi oryndy uıǵyr qyzy Zarına Abdrahmanova ıelendi. Sáýle Smaǵulova men Toıgúl Radjapova «Kórermender kózaıymy» dıplomyn jeńip aldy, Abaı Qunanbaevqa arnap jazǵan avtorlyq týyndysyn oqyǵan Jambyl oblysy, Jambyl aýdandyq «Aınalaıyn» qoǵamdyq uıymynyń múshesi Qolqanat Ońǵarbaevaǵa kitaphana dırektory uıaly telefon syılady. Kitaphana qyzmetkeri Qapıza Aıshýaqova Abaıdyń 37- qara sózin oqyp, 10 000 teńge kólemindegi sertıfıkatqa ıe boldy. Qalǵan qatysýshylardyń barlyǵy «Abaı oqýlary» atty zaǵıp jandar arasynda ótkizilgen qalalyq festıvalde joǵary shyǵarmashylyq jetistikter kórsetkeni úshin dıplomdarmen marapattalyp, shaǵyn syılyqtar tabys etildi.
Onymen qatar osy shara aıasynda «Abaı aınasy» atty kitap kórmesi uıymdastyryldy.
Saparbaı PARMANQUL,
«Egemen Qazaqstan»
ALMATY
