Alataý aýdanynda ornalasqan №14 qalalyq emhana − bastapqy medısınalyq-sanıtarııalyq kómek kórsetetin derbes uıym. Ol 35 myńǵa jýyq tirkelgen jandarǵa medısınalyq kómek kórsetetin aýqymdy emdeý ortalyǵy bolyp tabylady.
Serik Seıdýmanov memlekettik jáne úkimettik baǵdarlamalarǵa, nátıjeli jumyspen qamtý jáne jappaı kásipkerlikti damytý baǵdarlamasyna qatysty suraqtarǵa jaýap berip, júıeli reformalardy jalǵastyrýdyń mańyzdylyǵy jóninde aıtyp ótti.
Densaýlyq saqtaý salasynyń qyzmetkerleri mindetti áleýmettik medısınalyq saqtandyrý júıesin engizý jáne Alataý aýdanyn qoǵamdyq kólikpen qamtamasyz etý jóninde suraqtar qoıdy. Sonymen qatar, dárigerler medısına salasy boıynsha joǵary oqý oryndaryn bitirgen túlekterdiń óz eńbek jolyn bastapqy medısınalyq sanıtarııalyq kómek kórsetý júıesinen bastaýyn usyndy.
– «100 naqty qadam» Ult josparyn bizdiń elimizdi jáne onyń barlyq salasyn reformalaý maqsatynda naqty áreket etýge yqpal etetin qujat dep aıta alamyn. Munda medısınanyń alar orny erekshe. Ult jospary boıynsha mindetti áleýmettik medısınalyq saqtandyrý qabyldanǵan zańdar sheńberinde 2018 jyldyń 1 qańtarynan bastap óz kúshine enedi. Alataý aýdanyndaǵy №14 emhanada kezdesý uıymdastyrýyma da naqty sebep osy bolyp otyr. Basty maqsat osy júıeniń is barysynda qalaı jumys isteıtinin kórý, – dedi Serik Seıdýmanov.
Májilis depýtaty Almaty qalasyna sapary barysynda sondaı-aq, qalalyq áýejaıda, «Kazferrostal» kásipornynda bolyp, memlekettik organdar jáne Qoǵamdyq keńes ókilderimen kezdesýler ótkizedi.
Baǵashar TURSYNBAIULY,
«Egemen Qazaqstan»
ALMATY
