Aıdyn ıeleri alǵashqy bolyp gol jiberip aldy. Qonaqtardyń shabýylshysy Dmıtrıı Jýkenov matchtyń 23 sekýndynda qaqpashymyzdy qapy qaldyryp, esep ashty. Degenmen, jyldam soǵylǵan gol «Barysty» eseńgirete almady. Arada nebári alty mınýt ótkende elordalyq hokkeıshiler eki birdeı shaıba salyp, alǵa shyqty. Komanda quramyna jańadan qosylǵan oıynshylar Lınden Veı men Dmıtrıı Shevchenko mergendikterimen kózge túsken edi.
Ekinshi taım bastala salysymen «Barystyń» shabýylshysy Kevın Dallman ombylyq klýbtyń qaqpasynan sańylaý taýyp, esepti 3:1-ge jetkizdi. Bul nátıje ekinshi taımnyń orta tusyna deıin ózgermeı turǵan. Biraq, ústi-ústine shabýyldaǵan qonaqtar aqyry degenine jetti. Kezdesýdiń 28-mınýtynda Nıkıta Lısov bizdiń qaqpashy Henrık Karllson qorǵaǵan qaqpanyń qulpyn buzdy.
Oıynnyń sońǵy bóliginde «Barys» sapyndaǵy legıoner Naıdjel Doýs tórtinshi shaıbany soǵyp, komandanyń basymdyǵyn nyǵaıtyp bergen edi. Al matchtyń aıaqtalýyna az ǵana ýaqyt qalǵanda Qazaqstan hokkeı mektebiniń túlegi, qazirgi ýaqytta «Avangardtyń» sapynda óner kórsetip júrgen Semen Koshelev eseptegi aıyrmashylyqty qysqartyp ketti. Degenmen, bul shaıba matchta soǵylǵan sońǵy gol edi. Sóıtip, «Barys» 4:3 esebimen basym túsip, osy týrnırdegi ekinshi jeńisine qol jetkizdi.
Sondaı-aq, bul týrda Shveısarııanyń «Davos» komandasy «Admıraldy» (Vladıvostok) 4:0 esebimen tize búktirdi. Keshe keshkisin muz ústinde «Avangard» - «Neftehımık» jáne «Davos» - «Traktor» komandalary ózara jup qurap, tartysqa tústi.
Al «Barys» hokkeıshileri búgin týrnırdegi kezekti oıynyn Chelıabınskiniń «Traktorymen» ótkizedi.
Qaırat JÚNISULY,
«Egemen Qazaqstan»
