Jýyrda atalmysh mektep janynda jerles batyrǵa músin ornatyldy. Músinniń avtory – sáýletshi Elı Kachýev. Saltanatty sharaǵa batyrdyń týystary men qyzy Klara Martbekqyzy Mamyraeva, sonymen qatar qalalyq máslıhat hatshysy Qudaıbergen Beksultanov, Oktıabr aýdanynyń ákimi Álimjan Qanaev, ardagerler keńesiniń tóraǵasy Marat Aımaǵambetov qatysty.
Q.Beksultanov mundaı is-sharalardyń eskertkish janynda uıymdastyrylýy patrıottyq tárbıe berýde óte mańyzdy ekenin atap ótti. Aıta keteıik, tuǵyrǵa qonǵan tulǵa erlik isterimen el esinde qalǵan dańqty batyr. Ol 1908 jyly 2 naýryzda №20 aýylda (qazirgi Qarqaraly aýdanynyń Aqjol aýylynda) dúnıege kelgen. 1942 jyly Uly Otan soǵysyna attanady. Dneprdi alýda tanytqan áskerı erligi úshin Martbek Mamyraevqa KSRO Joǵary Keńesi Prezıdıýmynyń Jarlyǵymen 1944 jyly 15 qańtarda Keńes Odaǵynyń Batyry ataǵy men Lenın ordeni jáne «Altyn Juldyz» medali berilgen. Keńes áskeriniń quramynan demobılızasııalanǵan soń Martbek Mamyraev Kırov atyndaǵy shahtada partııa uıymyn basqardy, odan keıin Qaraǵandy qalasynyń Lenın aýdandyq partııa komıtetiniń birinshi hatshysy boldy, kenshiler astanasy atqarý komıteti tóraǵasynyń orynbasarlyǵyna saılandy. О́miriniń sońǵy kezinde ol hımııa-metallýrgııa ınstıtýtynda eńbek etti.
Mıras ASAN,
«Egemen Qazaqstan»
Qaraǵandy oblysy
