Onyń ishinde 60 451 oqýshy – jetimder sanatyndaǵy ata-anasynyń qamqorlyǵynsyz qalǵandar jáne múmkindigi shekteýli oqýshylar. Jalpy, óńirde Jambyl, Jýaly, Baızaq, Qordaı, Merki, T.Rysqulov, Talas, Sarysý jáne Taraz qalasynda alty memlekettik jáne tórt jekemenshik saýyqtyrý lagerleri ornalasqan. Búgingi tańda atalǵan lagerlerde josparlanǵan 7 217 oqýshynyń 5 790-y jazǵy demalystaryn ótkizýde.
Sondaı-aq, oqýshylardyń jazǵy demalystaryn sapaly ótkizý maqsatynda saýyqtyrý lagerleri, palatalyq lagerler, mektep janyndaǵy demalys alańdary, respýblıkalyq saýyqtyrý ortalyqtary jáne aýla klýbtary jumys istep keledi. Árbir mektepte balalardyń jazǵy demalystaryna arnalǵan zııatkerlik qyzmettiń túrli josparlary ázirlengen. Onda oqýshylardy týrıstik saıahattar men ekskýrsııalar, sporttyq jıyndar, túrli baǵyttaǵy úıirmeler, eńbek jasaqtaryna qamtý jumystary uıymdastyrylýda. Al 2017 jyly balalardyń jazǵy demalysy men saýyqtyrý is-sharalaryna jergilikti bıýdjetten 315 mıllıon 208 myń teńge bólingen.
Osy jyldyń 22 mamyrynda oblystyń bilim, din isteri jónindegi basqarmalary, tótenshe jaǵdaılar, ishki ister, qoǵamdyq densaýlyq saqtaý departamentteri qyzmetkerleriniń qatysýymen bilim bólimderiniń mamandaryna, qala syrtyndaǵy saýyqtyrý lagerleri men mektep janyndaǵy demalys alańdarynyń basshylaryna, aǵa tálimgerlerge arnalǵan oqytý semınary uıymdastyryldy.
Bıylǵy jazǵy maýsymda daryndy balalarǵa arnalǵan qazaq-túrik mektep-ınternattary bazasynda aǵylshyn tilin úırený kýrstaryn uıymdastyrý jáne joǵary oqý oryndarynda aǵylshyn tili mamandyǵy boıynsha oqyp jatqan 3, 4 kýrs stýdentterin volonter retinde jaz mezgilinde mektepterdegi aǵylshyn tili úıirmelerine tartý jumystary júrgizilýde.
Sonymen qatar, Astana qalasynda ótip jatqan EKSPO – 2017 halyqaralyq kórmesine kóp balaly jáne az qamtylǵan januıalardan shyqqan oqýshylardy qatystyrý úshin 6 152 balaǵa oblystyq bıýdjetten 241 mıllıon 873 myń teńge jáne 70 daryndy oqýshyǵa 3 mıllıon 294 myń teńge bólindi.
Aıta keterligi, aımaqta qyzmet kórsetetin barlyq saýyqtyrý lagerleri arnaıy kúzetpen jáne beınebaqylaý qondyrǵylarymen qamtamasyz etilgen.
Hamıt Esaman,
«Egemen Qazaqstan»
