Teńiz ortasyndaǵy provınsııanyń aq marjan qumdary talaıdy tánti etken. Tropıkalyq jemisteri til úıiredi. Tunyp turǵan ekzotıkalyq aımaq Qytaıdyń ońtústiginde ornalasqan. Haınan shıpajaılardyń arqasynda byltyr el ekonomıkasyna 2 mlrd AQSh dollarynan astam ınvestısııa tartypty. Endi olar Astanada qazaqstandyqtarmen ártúrli baǵyt boıynsha jumys isteýge ýaǵdalasty. «Bul qujat aıasynda Qytaımen ózara yntymaqtastyqty damytý úshin ekonomıkanyń túrli salalarynda naqty is-sharalar josparyn qurýdy usynbaqpyz. Alda áli talaı kezdesýler ótedi. Aspanasty eliniń týrızmi qarqyndy damyǵan. Kórshilerdiń bul tájirıbesin zerttep, zerdelep, ony Qazaqstanǵa engizý kerek», deıdi Qazaqstan-Qytaı saýda yntymaqtastyǵy qaýymdastyǵynyń basqarýshy dırektory Batyrbek Áýbákirov.
Haınan týrızm salasy boıynsha jyl basynan beri 320 mln dollar kóleminde paıda tapqan. Qytaı mádenıetimen 300 myńnan astam týrıst tanyssa, olardyń deni orys tildi demalýshylar eken. Jyl sońyna deıin bul aımaqqa 20 myńdaı qazaqstandyq barady dep kútilýde.
Provınsııaǵa vıza resimdemeı-aq, tikeleı áýe reısi arqyly ushyp barýǵa bolady. Haınan provınsııasy halyqtyq saıası konsýltatıvtik keńesiniń basshysy Iýı Sıýnniń aıtýynsha, damý qarqyny joǵary óńirdiń arnaıy ekonomıkalyq aımaǵy da bar. Endi eki eldiń qarym-qatynasyn odan ári nyǵaıta túsýge betburys jasalady. Halyqaralyq kórme aıasyndaǵy Haınan provınsııasynyń kúnderine oraı Qytaıdan jıyrmadan asa kásipker keldi. Olar medısına, aýyl sharýashylyǵy, týrızm salalary boıynsha jańa baılanystar ornatýǵa nıetti.
