Odan ári Taıland – 566 711, Úndistan – 557 480, Reseı – 515 321, О́zbekstan – 469 575, Japonııa 461 772 kórermen tartqan eken. Alǵashqy ondyqty túıindegen Saýd Arabııasynyń kórmesin 419 285 adam tamashalap úlgeripti. Kelip-ketýshiler sany 800 myńnan asqan «Nur Álem» pavılo-
ny ótkizýshi memleket retinde tizimnen oryn almapty. Bul derekter halyqaralyq kórme ortalyǵynyń eki aılyq qorytyndysyna arnalǵan jıynda málim boldy.
«Astana EKSPO-2017» UK» AQ basqarýshy dırektory Beıbit Qarymsaqovtyń aıtýynsha, kórmeniń ekinshi aıynda alǵashqy otyz kúnmen salystyrǵanda 1,4 ese kóp adam kelgen. «Nur Álem» sferasyna 746 myń adam kirdi. Munda da ósim – 1,4 ese. Shara bastalǵaly beri memleketter men halyqaralyq uıymdardyń 60-tan asa ulttyq kúni uıymdastyrylǵan. Endi 30-ǵa jýyq osyndaı shara ótedi. 160-qa jýyq taqyryptyq jıyn uıymdastyryldy. Kórmeni kóptegen eldiń memleket jáne úkimet basshylary men syrtqy ister mınıstrleri arnaıy aralady», dedi ol.
Ulttyq kompanııanyń qaýipsizdik boıynsha departament dırektory Rústem Shákenov kórmede eń kóp joǵalatyn, ıaǵnı kelýshiler joǵaltyp alatyn zat qujattar ekenin aıtty. «Bálkim, salaqtyǵynan, bálkim nemquraıdylyǵynan kelýshiler arasynda kıim-keshegin tastap ketetinder de jetkilikti. Sómkelerin otyrǵan jerinde umytyp ketetinder de bar. Eki aı ishinde 867 zat tabyldy, olardyń 273-i ıesine qaıtarylsa, 594-i saqtaýda tur», degen ol qaýipsizdikti qamtamasyz etý ortalyǵynyń jelisi boıynsha 1789 jaǵdaı tirkelgenin, onyń 26-sy usaq urlyq qylmysy ekenin málimdedi.
Kórme bastalǵaly beri EKSPO qalashyǵyna ornalasqan qonaqtar sany – 15416 adam. Dál qazirgi ýaqytta onda 5181 adam turyp jatyr. Sonymen qatar, esepti merzimde 4864 adam medısınalyq kómekke júginse, 49-y allergııa, dene qyzýynyń kóterilýi jáne qan aınalym júıesiniń buzylýy dertterimen aýrýhanaǵa jatqyzyldy. «Eki aıda jalpy somasy 131 767 992 teńgeni quraıtyn 84 495 dana lısenzııalyq ónim satyldy. Jáne 537,8 tonna ónim ákelindi. Qoǵamdyq tamaqtaný oryndarynda 558,7 myń kelýshige qyzmet kórsetildi. Taýar aınalymynyń jalpy somasy 905,7 mln teńgeni qurady», dedi kommersııalandyrý departamentiniń dırektory Dáýlet Erkinbaev.
10 maýsymnan 14 tamyzǵa deıin baılanys ortalyǵyna 44 242 adam júgingen eken. Onyń ishinde 26 261 qońyraý shalý bolsa, 965-i – ózge baılanys túrleri. Aqparat dúńgirshekterine júgingen azamattar sany – 17 016. Logıstıkalyq qyzmet kórsetýler boıynsha halyqaralyq pavılondarǵa 5 298 tonna júk jetkizildi.
18 tamyz kúni EKSPO-2017 kórmesi aıasynda elordaǵa Eıkon, Djon Nıýmen sııaqty álem juldyzdary qatysatyn mýzykalyq festıval ótedi. 19 tamyzda Eros Ramazottıdiń konserti bolady. Al 29 tamyz kúni áıgili Devıt Getta kelip, óner kórsetedi.
