Buryn ekinshi aınalym aıaqtalǵan kezde 12 klýb ekige bólinip, 1-6 oryn aralyǵyndaǵy komandalar júldege talassa, 7-12 oryndardaǵy ujymdar ózara kim myqtyny anyqtaıtyn. Al qazir komandalar qos altylyqqa jiktelmeıtin boldy. Oıyndar kúntizbesi Berger kestesi boıynsha túzildi. Iаǵnı, 12 komanda ózderiniń oryndaryna sáıkes sandarmen tańbalanǵan. Soǵan sáıkes, kóshbasshy men aýtsaıder, ekinshi kele jatqan komanda men 11-shi oryndaǵy klýb ózara oınap, qalǵandary da osy retpen bir retten kúsh synasatyn bolady.
Sheshýshi aınalymnyń birinshi týrynda top basyndaǵy «Astana» men «Qaırat» kezekti jeńisterine qol jetkizdi. «Temirjolshylar» syrt alańda «Aqtóbe» klýbyn 3:0 esebimen oısyrata jeńse, almatylyqtar «Oqjetpesten» kóp kúsh jumsamaı, bir dop aıyrmashylyǵymen basym tústi.
Sóıtip, kósh bastaǵan qos komanda ózgelerge shańyn da kórsetpeı, qara úzip ketti. Máselen, ekinshi orynda kele jatqan «Qaırat» pen úshinshi satyda turǵan «Ordabasy» klýbynyń arasyn baqandaı toǵyz upaı bólip tur. Soǵan qaraǵanda, Alekseı Petrýshınniń shákirtteri aldaǵy ýaqytta «kúmis» emes, qola júlde úshin kúresetin syńaıly. Bul týrda «Ordabasy» Qaraǵandyda «Shahterden» tegeýrindi qarsylyq kórip, 1:2 esebimen jeńilýge májbúr boldy. Jalpy, basshysy men bapkeri túgel aýysqan «kenshilerdiń» sońǵy oıyndardaǵy serpilisi komandanyń jankúıerlerin qýanyshqa bólep júr. Qazir qaıta túlegen «Shahterdiń» chempıonattaǵy úzdik altylyqtyń ishine engen jaıy bar.
«Astana» men «Qaırattyń» arasy da alshaq tur: jeti upaı degenińiz chempıonattyń sońǵy bóliginde Stanımır Stoılov ujymy úshin senimdi qor. Eń bastysy, mundaı basymdyq elorda klýbyna Chempıondar lıgasynyń pleı-off kezeńinde alańdamaı oınaýǵa múmkindik beredi.
Týrnır kestesiniń tómengi jaǵynda da bitispes kúres júrip jatyr. Eshkimniń de joǵary toptan «jer aýyp» ketkisi joq. Kósh sońyndaǵy «Aqjaıyq» Tarazǵa baryp, kútpegen jerden jergilikti klýbty 0:1 esebimen jeńdi de, ózinen bir saty joǵary turǵan «Aqtóbeni» yǵystyrdy. Al azýly «Aqtóbeniń» aýtsaıderdiń kúıin keshýi klýb fanattaryna da ońaı tıip jatqan joq.
Surmergender arasyndaǵy tartys ta qyzyp tur. «Qaırattyń» shabýylshysy Jerar Goý men astanalyq Jýnıor Kabananga úzeńgi qaǵystyryp keledi. Ekeýi de osy týrda gol soǵyp, dop sanyn, tıisinshe 16 jáne 15-ke jetkizdi. Al úshinshi orynda kele jatqan Patrık Tvýmasıdiń «Astana» enshisinde ázirge 9 gol bar.
Sonymen, el chempıonaty kimniń kim ekenin anyqtaıtyn sońǵy aınalymǵa da jetti. Otarbadan ozyp ketýge bolmas, dese de kimniń qandaı sybaǵa alary qazirdiń ózinde aıqyndalyp qalǵan sııaqty. Degenmen, fýtboldan bárin kútýge bolady. Onyń ústine Berger kestesiniń ishine búkken syry men tosynsyıy da mol bolýy ábden múmkin...
О́tken 23-týrdaǵy nátıjeler: «Aqtóbe» – «Astana» – 0:3 (0:1), Zenkovıch, 33 – óz qaqpasyna (0:1). Kabananga, 51 (0:2). Grahovas, 79 (0:3). «Qaısar» – «Tobyl» – 1:0 (0:0), Dja Djedje, 55 (1:0). «Shahter» – «Ordabasy» - 2:1 (0:0), Nurǵalıev, 60 (0:1). Gabyshev, 62 (1:1). Soke, 80 (2:1). «Oqjetpes» – «Qaırat» – 0:1 (0:1), Goý, 33 (0:1). «Atyraý» – «Ertis» – 0:0 (0:0). «Taraz» – «Aqjaıyq» – 0:1 (0:0), Shmıdt, 72 (0:1).
24-týrdyń oıyndary 19-20 tamyz kúnderi ótedi. 19 tamyz: «Astana» – «Oqjetpes», «Aqjaıyq» – «Aqtóbe», «Ordabasy» – «Atyraý». 20 tamyz: «Qaırat» – «Shahter», «Ertis» – «Qaısar», «Tobyl» – «Taraz».
Surmergender saıysy:
1. Jerar Goý («Qaırat», 1) – 16 dop;
2. Jýnıor Kabananga («Astana», 1) – 15;
3. Patrık Tvýması («Astana») – 9.
Qaırat ÁBILDA,
«Egemen Qazaqstan»
