Osyndaı shaǵyn eldiń EKSPO kórmesinde tikken pavılony da shaǵyn – bar-joǵy 18 sharshy metrdi quraıdy. Keshe osy eldiń ulttyq kúni ótip, oǵan premer-mınıstri Djosaıa Voreke Baınımarama jáne Qazaqstannyń Syrtqy ister mınıstri Qaırat Ábdirahmanov qatysty.
– EKSPO aıasynda ótkizilip jatqan ulttyq kúnder halyqaralyq mádenı baılanystardyń dánekeri ǵana emes, elderdiń ózara senimin nyǵaıtatyn mańyzdy tetik. Osyndaı kúnderi biz belgili bir eldiń salt-dástúrimen etene tanysyp, olardyń rýhanı-mádenı álemine de tereń boılaı túsemiz, – dedi Syrtqy ister mınıstri.
Qazaqstan men Fıdjı arasyndaǵy dıplomatııalyq baılanys 2012 jyldyń 6 maýsymynda ornaǵan. Qysqa merzimge qaramastan ekijaqty qarym-qatynas joǵary deńgeıge jetip, alys-beris kóbeıgen.
Al Fıdjıdiń premer-mınıstri: «Men Qazaqstanmen jarasymdy baılanys ornatqanymyzdy, ózara qarym-qatynasymyz nyǵaıyp kele jatqanyn kórsetkim kelip, aradaǵy alys jolǵa qaramastan ǵalamshardyń sonaý shetinde jatqan alys muhıttan ushyp keldim», deı kele, jurtshylyqqa óz eli jóninde baıandady.
Fıdjı – balamaly energııany tıimdi paıdalanatyn memleket. Mundaǵy áleýmettik nysandardyń barlyǵy kún energııasynan qýat alady eken. Tynyq muhıt plazasynda ornalasqan eldiń sulýlyǵyna tánti bolý úshin jylyna mıllıondaǵan týrıst osynda aǵylady.
«Biz tabıǵatty qorǵaýdy eń basty maqsatymyz sanaımyz. Elimizge ákelinetin jobalardyń aldymen ekologııalyq qaýipsizdigine kóz jetkizip alamyz. Syrtqy ortaǵa zııanyn tıgizbeıtin sharalardy ǵana bekitemiz. Osy arqyly biz álemge tabıǵattyń adamzat úshin qanshalyqty qundy ekenin dáleldik», deıdi Fıdjı premer-mınıstri.
Fıdjı jańǵyrmaly energııa kózderine erekshe qyzyǵýshylyq tanytady. Sebebi, búginde Fıdjı ımporttalǵan qazba otynǵa jylyna mıllıardtaǵan dollar jumsap otyr. Endi olar 2030 jylǵa qaraı sý, jel jáne bıootynǵa birjola kóshýdi ózderine maqsat etip, kómirtek shyǵyndaryn 30 paıyzǵa qysqartpaq.
Budan keıin fıdjılikter qurmetti qonaqtarǵa kórsetetin «Tama» sálem salý rásimin jasady. Baıqaǵanymyz, fıdjı – óte yrymshyl ári dástúrge berik halyq. Minezderi ashyq-jarqyn, án men bıge beıim bolǵanymen, ár nárseni baptap, bıpazdap jetkizgendi jón kóredi eken. Bir sálem salǵanynyń ózi bir saǵatqa sozyldy. Odan keıin erekshe qonaqtar men qolbasshylarǵa arnalǵan «kava» rásimin ótkizdi. Bul degenińiz, sol qonaqtyń endi «bóten emes, óz adamy bolǵanyn» bildiretin qasıetti rásim. Osy arqyly fıdjılikter qazaqtardy ózderine dos tutatynyn bildirip, qoshemet kórsetti.
Ulttyq kún ádemi án men bılerge ulasyp, fıdjılikter tek ózderine ǵana tán erekshe áýenderimen aınalany meıirim shýaǵyna bóledi.
Qymbat TOQTAMURAT,
«Egemen Qazaqstan»
sýretterdi túsirgen
Orynbaı Balmurat,
«Egemen Qazaqstan»
