«Maqta sharýashylyǵyndaǵy ǵylymı-zertteýlerdi damytý arqyly otandyq básekege qabiletti maqtanyń jańa sorttaryn shyǵarý, maqta óndirýdiń tıimdiligin, ınnovasııalyq tehnologııalardy óndiriske endirýmen aınalysatyn Maqtaral aýdanyndaǵy Qazaq maqta sharýashylyǵy ǵylymı zertteý ınstıtýtynyń ǵalymdary birqatar jetistikterge jetti. Elimizde otandyq maqta sorty joq edi jáne biz kórshi memleketterge táýeldi edik. 2000 jyldan bastap básekege qabiletti ózimizdiń otandyq sorttardy shyǵara bastadyq, qazirgi tańda olardy maqta óndirýshiler paıdalana otyryp, jalpy egistiktiń 85%-na endirdi. Sońǵy jyldary ınstıtýt ǵalymdary 30-dan astam ınnovasııalyq tehnologııa jasap, olardy óndiriske endirýge usynys berdi, 48 ınnovasııalyq jáne seleksııalyq patentterge, 144 avtorlyq kýálikke ıe boldy» – dedi ınstıtýttyń basshysy Ibadýlla Úmbetaev.
Sondaı-aq, ınstıtýtta fermerlerge bilim berý ortalyǵy ashylyp, maqta óndiretin óńirlerde 5 sharýashylyqtyń bazasynda ınstıtýttyń ǵylymı jetistikterin kórsetetin alańdar uıymdastyrylǵan eken.
Instıtýttyń jańalyqtaryn óńirge barynsha keńinen endirý úshin memleket tarapynan beriletin qoldaýlardy kóbeıtý máselesin aıtqan ǵalymdar depýtattan kómek surady. О́z kezeginde Qudaıbergen Erjan bul máseleni Parlamentte kóterip sheship berýge barynshy tyrysatyndyǵyn aıtty. Sondaı-aq, depýtat aýdandaǵy maqta alqabtaryn aralap, maqtashylardyń mazasyn alǵan «qurt» máselesin óz kózimen kórdi. Maqta qurtymen kúresý úshin memleket tarapynan beriletin kómekterdi kóbeıtýge de yqpal jasaıtynyn atap ótti.
«Bıyl Maqtaral aýdanynda 94 myń gektar jerge maqta daqyly egilgen. Memleket tarapynan kómek retinde 32 myń gektar jerge hımıkattar berildi, onyń ishinde 12 myń gektary órmekshi kenesine qarsy, 20 myń gektary kósek qurtyna nemese maqta kóbelegin joıýǵa baǵyttalǵan. Al, qalǵan jerlerge sharýalar óz qarajaty esebinen shyǵyn shyǵarýda. Sondaı-aq, 65 535 gektar jerde bıotásil arqyly maqtashylar zııankestermen kúresýde. Qurmetti Qudaıbergen Tólepuly, maqtanyń zııankesterine qarsy memleket tarapynan beriletin kómekterdi arttyrýǵa yqpal etýińizdi suraımyn» – dedi aýdan ákimi Ǵ.Ismaılov.
Maqta qurtynyń máselesine qanyq bolǵan depýtat 1 aı buryn paıdalanýǵa berilgen M-39 «Tashkent – Termez» baǵytyndaǵy halyqaralyq tranzıt dáliziniń hal-aqýalyn kórip qaıtty. «Syrdarııa» keden beketinde bolǵan Q.Erjan kedennen ótýshilerdi áńgimege tartyp, bekettiń jumysynyń sapasy týraly surady. Jolaýshy Farhad Sadırov kedenshiler tarapynan eshqandaı kederginiń joqtyǵyn aıtyp, týǵan jeri Jyzaq pen Tashkenttiń arasy 70 shaqyrymǵa qysqarǵanyn qýanyshpen jetkizdi.
Munan soń, depýtat aýdandyq «Nur Otan» partııasynyń ǵımaratynda jergilikti turǵyndardy qabyldady. Turǵyndar onkologııa jáne kardıologııa aýrýlary ortalyǵyn ashý, mádenıet úıleriniń ahýalyn túzeý, maqta qurtyna beriletin hımıkattardyń sapasyn túzeý, bıolabaratorııalardy kóbeıtý jónindegi máselelerdi depýtatqa jetkizdi.
«Buryn halyqpen kezdeskenimizde biryńǵaı sý, elektr, gaz máselelerin kóteretin. Qudaıǵa shúkir, ol máseleler bir júıege qoıylyp, retke keldi. Qazir turǵyndar «balama sport mektebi kerek, óner úıirmeleri kerek» degen sııaqty talaptaryn jetkizýde. Bul elimizdiń damyp jatqandyǵyn kórsetedi» – dedi Q.Erjan.
