Semeı qalasynda kóptegen tilderdi oqytý ortalyqtary ashylyp, memlekettik tildi jáne basqa da tilderdi oqytý jumystary júrgizilýde. Sonyń ishinde qalalyq ortalyqtandyrylǵan kitaphana júıesinde bıyl naýryz aıynda aǵylshyn tilin oqytý úıirmesi ashylǵan bolatyn. Bir ereksheligi úıirmege kelýshilir 58-80 jas aralyǵyndaǵy zeınetkerler. Ashylǵan kúni 5 oqýshysy bolǵan úıirmeniń búginde 15 qatysýshysy aǵylshyn tilin belsendi oqyp keledi.
Kitaphana dırektory Gúlnısa Moljıgıtovanyń aıtýynsha, osydan bir jyl buryn zeınetkerlerge kompıýter saýattylyǵyn oqytý úıirmesi jumys istegen. Ujymmen kelise kele jáne zeınetker oqyrmandardyń usynysy boıynsha aǵylshyn tilin oqytý úıirmesi ashylypty.
Úıirmege qatysýshy áıgili temirjolshy Moıynbaevtar dınastııasynyń ókili, uzaq jyl Semeı vokzalynyń basshysy bolǵan qazirgi zeınetker, Analar keńesiniń tóraıymy Naǵıma Abdýaıtqyzy: «Elbasynyń «Bolashaqqa baǵdar: rýhanı jańǵyrý» atty maqalasynda myna jahandaný zamanynda ultymyz básekege qabiletti bolý úshin, «Sıfrly Qazaqstan», «Úsh tilde bilim berý», «Mádenı jáne konfessııaaralyq kelisim» sııaqty baǵdarlamalardy júze asyrý qajettigi aıtylǵan. Bizdiń aǵylshyn tilin oqyp, úırengenimiz myna ósip kele jatqan óskeleń urpaqqa úlgi bolsyn, qaı jasta bolmasyn bilim alýǵa kesh emes degen oımen oqyp júrgen jaıymyz bar. Sondaı-aq, olar elimizdiń ıgiligi úshin talaptansyn, kóptiń ishinde bireýi emes, biregeıi bolýyna umtylsyn»,-deıdi.
Al, qyryq jyl án-kúı páninen sabaq bergen Ryskúl Qudysova: «Qazirgi zamanda qaıda barsań da, aǵylshynsha bilý qajet. Qazir ne kóp, kompanııa kóp. Bárine kirgiń keledi, biz de qartaıdyq demeı, tabys tapqymyz keledi. Biz sııaqty olar da talaptanyp, nıettensin deımiz. Árıne, bizdiń jasymyzǵa kelgende shet tilin úırený qıyn ǵoı, alaıda talaptanyp oqyp júrmiz. Qazirgi tańda, ómirge eń qajetti osy ınternet pen aǵylshyn tili bolyp tur»,-deıdi qart ájeı.
Tilge tıek etsek, dárister tegin júrgiziledi, aptasyna eki ret ótkiziledi. Oqytý kýrsy aıaqtalǵan soń túlekterge arnaıy kýálik saltanatty túrde tabystalady. Al zeınetkerlerdiń ýaqytynda kelý tártibi men izdenimpazdyqtary, qyzyǵýshyldyqtary kimdi bolsyn qaıran qaldyrady.
Anar Qýanǵalıeva,
Semeı qalasynyń
mádenıet jáne tilderdi damytý bóliminiń bas mamany
