«Kazakh Invest» UK» AQ aımaqtyq dırektory Ársen Nasyrhanov, Almaty qalasy «Atameken» AKP dırektory Iýrıı Tleýmuratov, «Zoodel» kompanııasynyń TMD elderi boıynsha bas dırektory Sardor Muhamedalıev qatysqan shara barysynda Almaty qalasynyń bıznes-assosıasııalarmen «О́zara túsinistik týraly» memorandýrmdaryna qol qoıyldy. Sondaı-aq, shara aıasynda óz jumysyn bastaǵan «Iá, sen eksporttaı alasyń!» atty bıznes-semınaryna búgingi eksporttaýshy kompanııalardyń ókilderi men bolashaqta eksporttaýmen aınalysqysy keletin azamattar qatysyp, qundy keńester aldy.
«Qazir «Qazaqstannyń eksporttyq ónimi 2017» anyqtamasynyń 9-basylymyn daıyndaý jumysy júrgizilýde. Bul Anyqtamada (orys jáne aǵylshyn tilderinde) qazirgi eksporttaýshylar jáne olardyń shyǵaratyn ónimderi týraly aqparat beriletin bolady. Sondyqtan sheteldik ınvestısııa tartýmen qatar, qazaqstandyq ónimdi halyqaralyq naryqqa shyǵarýmen aınalysatyn qazirgi jáne bolashaq eksporttaýshylar úshin «Zoodel.com» sııaqty zamanaýı V2V onlaın saýda alańdarynyń shyǵýy nur ústine nur bolyp otyr», – dedi «Kazakh Invest» UK» AQ aımaqtyq dırektory Ársen Nasyrhanov.
«Qazaqstan taýarlaryn syrtqy naryqtarǵa shyǵarýǵa kómektesý» memlekettik baǵdarlamasynyń aıasynda jáne QR Ulttyq ekonomıka mınıstrliginiń, «Kazakh Invest» UK» AQ, «Atameken» QR UKP jáne aımaqtyq ákimdikterdiń qoldaýymen el aımaqtarynda bıznes-semınarlar ótkizip júrgen Zoodel kompanııasy úshin Almaty – jospardaǵy jıyrma qalanyń on ekinshisi eken.
Eksporttyq operasııalar jelisin tıimdi basqarýǵa múmkindik beretin aqparattyq tehnologııalardy qoldana otyryp, jergilikti eksportty ilgeriletýdiń jańa quraldaryn usynýdy maqsat tutqan semınar barysynda Almaty qalasy taýar óndirýshileri TMD men Túrkııa, Qytaı, Úndistan, Iran, Aýǵanstan, Pákistan sııaqty Uly Jibek joly boıyndaǵy elder naryqtaryna shyǵýǵa arnalǵan «Zoodel.com» atty jańa onlaın quraly týraly aqparatpen tanysty. Oqytý, marketıng, saýda seriktesterin anyqtaý, logıstıka, qaýipsiz tólem jasaý, kóptildi kontent, tenderlerge qatysý jáne basqa qyzmetter kórsetetin atalmysh onlaın qural eksport, shaǵyn jáne orta bıznesti damytý boıynsha tolyq qyzmet beretin halyqaralyq B2B onlaın saýda alańy bolmaq.
Shilde aıynyń sońynda Atyraý qalasynda bastalyp, elimizdiń irili-usaqty birqatar qalalarynda jalǵasyn tapqan «Iá, sen eksporttaı alasyń!» semınary 7 qyrkúıekke deıin sozylmaq. «Zoodel» kompanııasynyń TMD elderi boıynsha bas dırektory Sardor Muhamedalıev: «Taýaróndirýshilerdiń kóbi oılanbastan halyqaralyq naryqqa shyǵyp, ótkizý naryǵyn izdeý, eksporttaý múmkindigi týraly aqparattyń jetkiliksizdigi sııaqty ártúrli qıyndyqtar týyndaǵan kezde jarty jolda toqtap qalatyndary bárimizge málim. Bızneske kómek retinde biz ótkizý naryǵy arnalaryna qol jetkizýdi qamtamasyz etetin keshendi IT-sheshimderdi usynyp, kóp tildi kontent jasaı otyryp, tildi túsinbeý máselesin de sheshýge, marketıng boıynsha alǵa jyljýǵa, klıentter izdeýge kómektesemiz, saýda seriktesterin anyqtaımyz, logıstıkany esepteımiz. www.zoodel.com onlaın alańynda jumys isteı otyryp, taýar óndirýshiler eksporttyq operasııalaryn keńselerinen shyqpaı-aq basqaryp, óz shyǵyndaryn ońtaılandyra alady», – dep málimdedi.
Mıra BAIBEK,
«Egemen Qazaqstan»
ALMATY
