Aqparat jáne kommýnıkasııa mınıstri Dáýren Abaev jańa maýsym aıasynda «Qazaqstan» korporasııasyna enetin barlyq resýrstarǵa qatysty jasalǵan rebrendıngtiń aıtarlyqtaı jańa qadam ekenin atap ótip, ujym qyzmetine sáttilik tiledi. Mınıstrdiń aıtýynsha, aldaǵy eki-úsh jyldyń ishinde analogtik habar taratýda tolyǵymen sıfrly júıege kóshý, spýtnık jelisi arqyly teleaýdıtorııany arttyrý, otandyq teleserıal ónimin kóbeıtý – otandyq telearnalardyń basty mindeti.
Jańa maýsymdaǵy jańǵyrý týraly «Qazaqstan» RTRK Basqarma tóraǵasy Erlan Qarın áńgimeledi. Korporasııa jetekshisiniń aıtýynsha, rebrendıng barysynda «Qazaqstan» RTRK medıa aktıvterine ortaq, tanymal logotıp bekitilip, reneımıng, redızaın jumystary júrgizildi. Jańa logotıpti qabyldaý barysynda kóptegen álemdik telearnalardaǵy úrdister saralanyp, zamanaýı trendter eskerildi. Sondaı-aq grafıkalyq-estetıkalyq erekshelikterdi nazarǵa ala otyryp, korporasııa quramyndaǵy arnalar men radıostansalardyń birtutastyǵyn bildiretin arnaıy belgi retinde elimizdiń Memlekettik Týynyń túsi negizge alyndy. Budan bylaı «Qazaqstan» ulttyq arnasy, «Qazsport», «Balapan» arnalarynyń logotıpteri bir negizde ári latynsha jazylmaq. Bul korporasııanyń tehnologııalyq damýǵa umtylysyn, halyqaralyq medıanaryqtaǵy ornyn, úlken medıaotbasy resýrstarynyń sabaqtastyǵyn bildiredi, dep túsindirdi korporasııa jetekshisi. Logotıp jobasyn tanymal qazaqstandyq rejısser jáne dızaıner Sáken Joldas daıyndaǵan eken.
Sondaı-aq korporasııa quramyna enetin 14 aımaqtyq arnalardyń ataýlary da ózgertilmek. Burynǵy «Qazaqstan – Aqtaý», «Qazaqstan – Shymkent», «Qazaqstan – Qaraǵandy» sııaqty ataýlardyń ornyna endi jekelegen, sol aımaqqa úırenshikti ataýlar engiziletin bolady. Mysaly, Altay, Mangystau, Ontustik, Saryarqa, Aqjaiyq, Atyrau dep atalatyn boldy. Ulttyq sanany jańǵyrtý jónindegi Elbasy tapsyrmasyna oraı jasalǵan bul ózgertýler aımaqtyq arnalarǵa ishki telenaryqta derbes jumys júrgizýge jáne aýdıtorııanyń keńeıýine baǵyttalǵan.
Odan bólek telearnalardyń grafıkalyq bezendirilýi, mýzykalyq-toptamalary jáne «Qazaqstan» ulttyq arnasynyń resmı daýysy da ózgerdi. Jalpy, rebrendıngtiń basty maqsaty – korporasııanyń barlyq medıa aktıvterine tán, ulttyq dástúrdi áıgileıtin, korporasııanyń jańa álemdik standarttarǵa talpynysyn kórsetetin birtutas tanymal belgi qurý.
Elimizdiń kórikti tabıǵat oryndaryn nasıhattaý maqsatynda grafıkalyq ID rolıkter tartymdy shyqqanyn aıta ketý kerek. Jarnama rolıkteriniń bezendirilýi de maýsymdyq erekshelikterge negizdelgen. Sonymen birge ańdatpa, jańalyqtar toptamasy, aýa raıy ispetti kúndelikti efırlerdiń bezendirilýinde, daýys, áýen men mýzykalyq kórkemdelýinde de ózgeshelik bar. Saýnd-trekterdi daıyndaǵan belgili kompozıtor Arman Muqataı.
Jańa maýsymda «Qazaqstan» ulttyq arnasy kórermenderin túrli baǵyttaǵy jobalarymen qýantpaq. Atap aıtqana, Jibek joly boıyndaǵy elderdiń jas talanttarynyń basyn qosatyn «Jibek joly juldyzy», tól ónerdi ulyqtaıtyn «Men qazaqpyn» halyqaralyq mýzykalyq megajobalary, ulttyq estradany nasıhattaıtyn «Hit Qazaqstan» mýzykalyq án-sherýi jańa maýsymda efırge ense, oıyn-saýyqtyq baǵdarlamalarǵa qosa qoǵamdyq, ıntellektýaldyq baǵyttaǵy baǵdarlamalardyń da sany artady. Búgingi zamannyń suranysyna saı keletin realıtı-shoý janryndaǵy baǵdarlamalar kórsetiledi. Kásipkerlikti nasıhattaıtyn «Úmitker», tabıǵattyń tylsym kúshi men qudiretin kórsetetin «24 saǵat tabıǵat qushaǵynda» ekshn realıtı-shoýy, otanymyzdyń kórikti jerlerin tanystyratyn «El ishinde», otbasylyq qundylyqtardy dáripteıtin «Ene men kelin», jas urpaqqa tálim-tárbıe beretin «Arý ana», túrli mamandyqtyń syry men qyryn kórsetetin «Seniń ornyńda» syndy áleýmettik, rýhanı, qoǵamdyq baǵdarlamalar qatary kóbeıedi.
Sonymen qatar, efırden birqatar derekti fılmder toptamasy da oryn alady. Onyń ishinde, Qazaqstannyń kópshilikke beımálim tarıhy týraly áńgimeleıtin «Kıeli Qazaqstan», elimizdiń áıgili adamdary jaıly syr shertetin «Uly dala ulaǵaty», aqtańdaqtar tarıhy týraly «Alashtyń amanaty» óz kórermenin tappaq. Sondaı-aq «Qazaqstan» telearnasynyń serıaldary jyldan jylǵa kóbeıip kele jatqanyn, atalǵan ónimder kórshi elderdiń telenaryǵynda suranysqa ıe bola bastaǵanyn aıta ketken lázim. 2009 jyldan beri telearna alýan taqyrypty qamtıtyn 77 telehıkaıa usynǵan eken. Bıyl ultqa degen uly mahabbat «О́mir dastany» tarıhı dramasynda, tiginshi qyzdyń ómirin beıneleıtin «Ińkár júrek» telehıkaıasynyń ekinshi maýsymy, izgilik pen mansap tarazyǵa túsken «Eki júz», ómirdiń óktemdigine moıymaǵan «Ana qadiri», túrli ult pen ulysqa meken bolǵan «Týǵan jer», astarly ázil arqyly maǵynaly oı aıta bilgen «Jańa qonystyń» ekinshi maýsymy, shynaıy mahabbat jolyndaǵy tartystar kýási «Qozy Kórpesh-Baıan sulý», senim men úmitti arqaý etken «Saǵan senemin» sııaqty kórermender suranysyna ıe serıaldar kóshi jalǵasyn taba bermek.
Rebrendıng aıasynda burynǵy baǵdarlamalardyń da formaty ózgeredi. 28 tamyzdan bastap «Qazaqstan» ulttyq arnasy «Alma TV», «ID TV» sııaqty eldegi iri kabeldik operatorlar arqyly HD formatta habar taratatyn bolady.
Al otandyq telekeńistiktegi tuńǵysh sport arnasy sanalatyn «Qazsport» bıylǵy kúzde elimizdegi eń tanymal sport túrlerinen, ásirese, kúres, boks jáne dzıýdodan ótetin álem chempıonattarynan translıasııa jasaıdy. UEFA Chempıondar lıgasy men Eýropa lıgasynan, onyń ishinde «Astana» klýbynyń Eýrokýboktaǵy barlyq kezdesýinen jáne basqa da iri sporttyq jarystardan kórsetilim, kásibı sportshylardyń ómiri týraly derekti fılmder men arnaıy reportajdar, dúbirli doda ortasynan beriletin «Match qarsańynda», «Matchtan keıin» baǵdarlamalary jáne basqa da jobalar men teleoıyndar efırge shyǵady.
12 jasqa deıingi kórermender aýdıtorııasyn qamtıtyn, elimizdegi alǵashqy balalar arnasy «Balapan» keleshek urpaqtyń kókjıegin keńeıtýde, qarym-qabiletin arttyrýda, otanshyldyqqa tárbıeleýde mańyzy zor baǵdarlamalardy jaryqqa shyǵaryp keledi. Balalarǵa basty bazarlyq retinde bıyl bul arnada «Qalqanqulaq» atty tuńǵysh qııal-ǵajaıyp janryndaǵy balalar telehıkaıasy, «Saıahat» realıtı-shoýy, «Alan men Qozyqa» anımasııalyq fılmi, «Balapan juldyz» shoý-konserti jaryqqa shyǵatynyn aıtýǵa bolady.
Korporasııa quramyndaǵy «Qazaq», «Shalqar», «Astana» jáne «Klassık» radıo jelileri enetin «Qazaq radıolary» kompanııasynyń da jańalyqtary jeterlik. Áýe tolqynynda «Kezeń», «Alashnama», «Álem ádebıeti», «Qaýyrsyn qalam», «Aıtys», «Jyr-kerýen», «Aldaspan», «Sarbaz», «Aq otaý» jáne basqa da kóptegen rýhanı baǵdarlamalardy shyǵaryp kele jatqan radıolardyń jetekshisi M.Manatbektiń aıtýynsha, endi radıony planshet, kompıýter, smartfon sııaqty qurylǵylar arqyly da tyńdaýǵa bolady. Radıo ujymy «Jan jylýy» baǵdarlamasy arqyly qaltaly azamattar men muqtaj jandar arasynda dáneker bolyp, kóptegen qaıyrymdylyq isterdi atqaryp keledi. Sondaı-aq «Úı tapsyrmasy» atty jańa baǵdarlama arqyly oqýshylar kúndelikti sabaqqa ázirlene alady.
Tarıhy alǵash ret 1958 jyldyń 8 naýryzynda Almaty stýdııasynda efırge shyqqan qazaq televızııasynan bastaý alatyn «Qazaqstan» teleradıokorporasııasy búginde 3 respýblıkalyq, 14 aımaqtyq telearna, 4 radıo, 36 ınternet-saıttyń basyn qosqan, elimizdiń aqparat alamanynda qorǵasyndaı salmaǵy bar medıaresýrs. 60 jyldyq qarsańyndaǵy bıylǵy ózgeristerdiń Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» maqalasyndaǵy mindetter men tapsyrmalar aıasynan tabylatynyn jetkizgen korporasııa jetekshisi E.Qarın álemdegi ózgeristerge ilesip kele jatqan elimizdiń tynys-tirshiligin jetkizýde aldymen telearnanyń ózi ózgere bilýi kerektigin aıta kelip: Búgingi urpaqqa qandaı dúnıe kórsetsek, erteń sondaı qoǵam qalyptasady. Sondyqtan, televızııa jańa qoǵamdyq qundylyqtardy, zor talǵamdy qalyptastyrýda qyzmet etip, ıntelektýaldy urpaqtyń ósýine yqpal etýi kerek. Biz elimizdiń kıeli ataýyn ıelengen birden-bir ujymbyz. Bul biz úshin erekshe maqtanysh ári jaýapkershilik, dedi.
Dýman ANASh,
«Egemen Qazaqstan»
