Elimizdiń búgini men bolashaǵy úshin tıisti zańnamalardyń orny árqashan da erekshe. Sol zańdardy shyǵaratyn eń joǵary ókiletti organ – qos palataly Parlament. Depýtattar ózderine tıesili kanıkýldan soń jáne jergilikti jerlerde saılaýshylarmen kezdesýlerden keıin úshinshi sessııanyń jumysyna kiriskeli otyr... Parlamenttiń ekinshi sessııasy óte mańyzdy jáne tarıhı kezeńde ótkeni belgili. Sonyń eń bastysy – Qazaqstannyń Táýelsizdigine 25 jyl toldy. Osy mereıtoı qarsańynda Parlament depýtattary Prezıdenttiń tarıhı tulǵasyn ashatyn, elimizdiń damý jolyn kórsetetin mańyzdy qujat – Qazaqstan Respýblıkasy táýelsizdiginiń 25 jyldyǵy deklarasııasyn qabyldady.
Parlamenttiń aldynda turǵan asa jaýapty máseleniń biri – Qazaqstan Respýblıkasynyń Konstıtýsııasyna ózgerister men tolyqtyrýlar engizý týraly» zań jobasy edi. Memleket basshysy Konstıtýsııalyq reformaǵa qatysty ózgeristerdi kópshilik qaýymǵa aldyn ala jarııalap, qazaqstandyqtar ony bir aı boıy talqylady, usynystary men pikirlerin bildirdi. Nátıjesinde Prezıdent ókilettiginiń bir bóligi Parlament pen Úkimetke berildi. Mine, bul myqty prezıdenttik bılikti saqtaı otyryp, demokratııany ári qaraı nyǵaıtýǵa, halyqtyq bılikti kúsheıtýge jáne Parlament pen Úkimettiń jaýapkershiligin arttyrýǵa jol ashty.
«Bul ózgeristerdi bizdiń depýtattarymyz joǵary senim men Elbasymyzdyń, halyqtyń, memlekettiń aldyndaǵy zor jaýapkershiligi dep qabyldady, – degen bolatyn Májilis spıkeri Nurlan Nyǵmatýlın Parlamenttiń ekinshi sessııasynyń jabylýynda sóılegen sózinde. – Dál osy senim, dál osy jaýapkershilik depýtattyq korpýsty odan da belsendi, odan da jigerli jumys isteýge shaqyrdy». Bul jolda, eń aldymen, Elbasynyń alǵa qoıǵan jańa mindetterin sapaly zańdarmen qamtamasyz etýge erekshe kóńil bólingenin atap ótken jón. Sondaı-aq, Konstıtýsııalyq reformany tıimdi júzege asyrý úshin kóptegen zańdarǵa ózgerister de engizildi.
«Jańa sessııada sizder talqylap, qabyldaýǵa tıis 50-ge jýyq zań jobasy bar. Jeti jańa zańdy depýtattardyń ózderi usynyp, Úkimet qabyldady. Bul bastamalar depýtattar korpýsynyń joǵary kásibıligin dáleldeıdi», – dep atap ótken edi Memleket basshysy Parlamenttiń altynshy shaqyrylymynyń ekinshi sessııasyn ashardaǵy sózinde. Parlament músheleri Prezıdenttiń alǵa qoıǵan strategııalyq tapsyrmalaryn iske asyrýǵa da belsene aralasty. Sonymen qatar, Elbasynyń Joldaýynda jáne «Qazaqstan-2050» Strategııasynda kórsetilgen mindetter de Parlament jumysynyń basym baǵyttarynyń biri boldy.
Jalpy, ekinshi sessııada qos palatanyń 6 birlesken otyrysy, Senattyń – 25, al Májilistiń 38 jalpy otyrysy ótken. Atalǵan kezeńde Parlament qaraýynda 111 zań jobasy bolǵan, sonyń 84-i qabyldanypty. Olardyń ishinde 15 zań jobasyna depýtattardyń ózderi bastamashy boldy. Parlament qabyldaǵan 66 zańǵa Elbasy qol qoıyp, kúshine endi. Parlament, sondaı-aq, elimizdiń syrtqy saıasatyn qamtamasyz etýge, halyqaralyq baılanystardy damytýǵa, memleketter arasyndaǵy qyzmetti retteýge, taǵy basqa salalarǵa arnalǵan kóptegen halyqaralyq kelisimderdi de ratıfıkasııalady.
«Parlament – halyq ókildiginiń basty organy. Sondyqtan Parlament palatalarynyń qyzmeti qoǵam úshin barynsha jarııaly bolýy tıis, – degen bolatyn Elbasy. – Zańdarǵa degen qajettilik pen olardy qabyldaýdyń búkil qısyny qazaqstandyqtarǵa túsinikti bolýynyń mańyzy zor. Kúzden bastap Senat pen Májilis jumystaryn, sondaı-aq, Parlament palatalarynyń birlesken otyrystaryn onlaın rejiminde taratatyn bolady».
Parlament Memleket basshysynyń osy aıtqandarynan naqty nátıje shyǵardy. Jalpy otyrystar men Úkimet saǵattary onlaın rejiminde kórsetile bastady. Parlamentte talqylanǵan mańyzdy máselelerge qoǵamdyq uıymdar músheleri, Parlamentke kirmegen saıası partııalar men buqaralyq aqparat quraldarynyń ókilderi de qatysyp, usynys-pikirlerin aıtýǵa barlyq jaǵdaı jasalyndy. Bul Parlament jumysynyń burynǵydan da ashyq jáne sapaly bolýyna zor yqpal etti.
Depýtattyq korpýs óz jumysynda zań shyǵaryp qana qoımaı, Elbasymyzdyń bastamalaryna qoldaý kórsetý jóninen de aldyńǵy qatardan kórinip keledi. Ásirese, Prezıdenttiń Joldaýyn halyqqa jetkizýde, «Qazaqstan-2050» Strategııasyn, «100 naqty qadam» Ult josparyn nasıhattaýda erekshe ról atqaryp júr. Sonymen birge, Parlament Elbasymyzdyń «Bolashaqqa baǵdar: rýhanı jańǵyrý» maqalasynda atalǵan máselelerdi júzege asyrýǵa da belsene atsalysýda. О́ıtkeni, Memleket basshysy atap ótkendeı, bul – bizdiń ulttyq birligimizdiń jáne bolashaǵymyzdyń negizi. Al Parlamenttiń aldyna qoıylatyn basym baǵyttar men depýtattyq korpýsqa júkteletin mindetterdi Prezıdent altynshy shaqyrylymnyń úshinshi sessııasynyń ashylýynda belgilep bermek.
Álısultan QULANBAI,
«Egemen Qazaqstan»
