Sharaǵa Qyzylorda oblysynyń ákimi Q.Kósherbaev, aýyl sharýashylyǵy salasynyń mamandary, eńbek ardagerleri men aýyl aqsaqaldary qatysty. Aımaq basshysy «Aqtóbe ı K» JShS-niń kúrishtiń ırandyq "tarom-hoshımı" sorty egilgen egis alqabymen jáne kúrish aqtaý zaýytynyń jumysymen tanysty.
- Memleket basshysy óziniń «Qazaqstannyń úshinshi jańǵyrýy: jahandyq básekege qabilettilik» atty joldaýynda agrarlyq sektor ekonomıkanyń jańa draıverine aınalýy kerektigin atap ótip, osy salany damytý baǵytynda aldymyzda naqty mindetter qoıdy. Elbasynyń agrarlyq sektordyń aldynda qoıǵan mindetterin iske asyrý maqsatynda ótken jyly oblys tarıhynda alǵash ret aýyl sharýashylyǵy ónimderin naryǵyna keshendi marketıngtik zertteýler júrgizip, agrarlyq sektordyń múmkindik áleýetterin zerttep, oblystyń agroónerkásiptik keshenin damytýdyń Agrokartasyn qabyldadyq. Agrokartada negizgi mindet retinde aýyl sharýashylyǵy salasynyń eksporttyq áleýetin arttyrý, sonymen qatar jyldam damytýdy qajet etetin salalardy aıqyndap aldyq. Aımaqtyń aýylsharýashylyq ónimderin eksporttaıtyn elder Qytaı, Iran, Túrkııa, Reseı jáne Eýroodaq elderi bolyp belgilengen,- dedi oblys ákimi semınar-keńeste.
Semınar-keńeste aýdan ákimderiniń jáne oblystyq aýyl sharýashylyǵy basqarmasy basshysynyń esepteri tyńdaldy.
Aımaq basshysynyń aıtýynsha bul 2021 jylǵa qaraı, Qyzylorda oblysynyń aýyl sharýashylyǵy ónimderiniń eksport kólemin arttyrýǵa múmkindik beredi.
Kúrish óndirisi jáne ony qaıta óńdeý agroónerkásip keshenin damytýdyń basym baǵyttarynyń biri bolyp sanalady. Kúrishtiń perspektıvalyq naryqtarynyń biri - Iran Islam Respýblıkasy. Qazirdiń ózinde Iran memleketi jylyna 3 mln. tonnaǵa jýyq aq kúrish ımporttaıdy.
Aıta keteıik, bıyl oblys boıynsha 90 myń gektar alqapqa kúrish daqyly egilip, ótken jylmen salystyrǵanda kórsetkish 10 myń gektarǵa deıin ulǵaıdy.
Oblystyq aýyl sharýashylyǵy basqarmasynyń resmı málimetine sáıkes bıyl oblys boıynsha barlyǵy 181,2 myń ga jerge aýyl sharýashylyǵy daqyldary ornalastyryldy. Onyń ishinde dándi daqyldar 97,7 myń, maıly daqyldar 6,8 myń, mal azyqtyq daqyldar 60,1 myń, jáne kartop, kókónis, baqshalyq daqyldar 16,6 myń ga.
