Atalǵan jekpe-jek bastalmas buryn, «Saryarqa» sport kesheniniń ishine lyq tolǵan jankúıer qaýym kásipqoı boksta baq synap júrgen bir top qazaqstandyq sheberlerdiń ónerin tamashalady. Atap aıtqanda, Meıirim Nursultanov (4-0, 3 KO) qarsylasy Ismael Býenony (15-7, 10 KO) birinshi raýndta nokaýtpen jeńdi. Qazaqstannyń týmasy, qazirgi ýaqytta AQSh-ta polısııa qyzmetkeri bolyp jumys isteıtin Dımash Nııazov (12-0-3, 5 KO) Edýardo Pereıra dos Reısten (22-5, 18 KO) upaı sany boıynsha basym tústi. Alı Ahmedov (9-0, 7 KO) pen Djastın Tomas (18-3, 7 KO) arasyndaǵy jekpe-jek tartysqa toly boldy. Degenmen, qazaqstandyq boksshy qarsylasyn segizinshi raýndta tehnıkalyq nokaýtpen tize búktirdi.
Sondaı-aq Aıdos Erbosynuly (7-0, 6 KO) Honatan Heronımo Barbadılony (17-5-1, 14 KO), Nursultan Jańabaev (3-0, 2 KO) Aleks Sandro Dýarteni (13-2-1, 10 KO) birinshi raýndtyń ózinde esten tandyryp, nokaýtpen jeńiske jetti. Al aýyr salmaqtaǵy Rýslan Myrsataev (4-0, 4 KO) bolsa, Andres Matıas Afranlıdi (5-1, 5 KO) jekpe-jektiń tórtinshi raýndynda tehnıkalyq nokaýtqa túsirdi. Budan keıin sharshy alańǵa kóterilgen Jánibek Álimhanuly (2-0, 1 KO) Jılberto Pereıra dos Santosty (14-5, 10 KO) jáne Janqosh Turarov (22-0, 15 KO) Brýno Leonardo Romaıdy (21-5, 18 KO) «oınap» júrip jeńdi. Bul jekpe-jekterde nokaýt bolmasa da, tóreshiler alqasy bizdiń boksshylarǵa jeńisti biraýyzdan berdi.
Al boks keshiniń basty jekpe-jegi joǵaryda aıtqanymyzdaı, Qanat Islam men kanadalyq Brendon Kýk arasynda órbidi. Buǵan deıin ótkizgen 18 jekpe-jeginiń bir de birinde jeńilip kórmegen kanadalyq boksshy osal emes. On eki raýndtyq formatta ótken jekpe-jekte júlde retinde birinshi orta salmaqtaǵy WBA Inter-Continental tujyrymynyń WBO NABO beldigi tigilgen bolatyn.
Brendon Kýk birinshi ret úshinshi raýndta, odan keıin besinshi jáne segizinshi ranýdtarda nokdaýnǵa tústi. Eki ret gong soǵylmaǵanda, «Buzyq balanyń» sharýasy mezgilinen buryn bitýi de múmkin edi.
Jekpe-jektiń toǵyzynshy bóligine kelgende Qanat Islamnyń ekinshi tynysy ashylǵandaı, shabýyldy údete tústi. Onyń aýyr soqqylary qarsylasynyń esin jıdyrmaı, ábden tıtyqtatty. Kezekti bir soqqy tıgende gúrs etip qulaýy da ábden múmkin edi. Osynyń bárin baıqap júrgen tóreshiniń de shydamy taýsylǵan bolý kerek, toǵyzynshy raýnd aıaqtalmaı jatyp jekpe-jekti toqtatty. Tehnıkalyq nokaýt!
Sonymen, 32 jastaǵy Qanat Islam óziniń 25-shi jekpe-jeginde jeńiske jetip, birinshi orta salmaqtaǵy WBA Inter-Continental tujyrymynyń WBO NABO chempıondyq beldigin ıemdendi. Qazaq jankúıerleri endi Qanat Islamnyń ózine laıyqty qarsylas bolatyn, álemdik kásipqoı boksta aty shyqqan áldi boksshylarmen judyryq túıistirgenin qalaıdy.
Qaırat ÁBILDA,
«Egemen Qazaqstan»
