Oblystyq mýzeıdiń ǵylymı-ekspozısııalyq jumys jáne qordy esepke alý bólimi meńgerýshisiniń mindetin atqarýshy Móldir Qyzdarbekovanyń aıtýynsha, negizinen bul áshekeılerdi mýzeıge jergilikti halyq tapsyrǵan eken. Máselen, 1970 jyly Taraz qalasynyń turǵyny ótkizgen kúmis bileziktiń tilimi jalpaq, dóńgelek ushtary qosylmaǵan. Onyń orta tusy ósimdik-zoomorftyq órnektermen aýysyp otyratyn tompaqsha kelgen úsh jarty sferalyq fıgýralarmen áshekeılengen. Bileziktiń shetteri syzyqtarmen sándelip jasalǵan. Sondaı-aq 1979 jyly Taraz qalasynyń turǵyny anasynan qalǵan kúmis qos bilezikti oblystyq mýzeıge syıǵa tartypty. Bul bileziktiń ereksheligi – jalpaq, kólemdi etip jasalǵan. Mýzeıdegi eń qundy ári salmaǵy aýyr bilezikterdiń birinen sanalatyn bul áshekeıde zerger qazaqtyń oıý-órnekterin, jalpy rýhanı baılyǵyn kórsete bilgen. Shetterin ırekteý, úshburyshty fıgýralar salý jáne shıratý, órý tehnıkasymen ártúrli órnekter salynǵan. О́kinishke qaraı, muny jasaǵan zergerdiń aty-jóni belgisiz bolyp otyr. Al 1989 jyly Taraz qalasynyń turǵyny ájesinen qalǵan XIX-XX ǵasyrlarǵa jatatyn kózdi bilezikti de osy jerge tabystaǵan eken. Bul áshekeıge jumyr nemese jalpaq kúmisten betine bederli órnekter jasap, alty qyzyl tústi asyl tas kózderi ornatylǵan.
Mýzeı qoryn tolyqtyrý maqsatynda, 2005 jyly arnaıy mýzeı qyzmetkerlerinen jasaqtalǵan ekspedısııa tobyna B.Momyshuly aýylynyń turǵyny qos kúmis bilezikti syıǵa tartypty. Qos bilezik qolǵa taǵýǵa arnalyp jasalǵandyqtan, jartylaı dóńgelek bolyp keledi. Bileziktiń eki jaǵy segiz sanymen kóldeneńinen bederlengen.
Hamıt ESAMAN,
«Egemen Qazaqstan»
Jambyl oblysy
