Serik Sápıev atalǵan jekpe-jekti Qaraǵandydaǵy boks ortalyǵynda jankúıerlermen birge tamashalaǵan. Onyń aıtýynsha, Golovkın bul kezdesýde 7:5 esebimen jeńiske jetken. «Menińshe, Gennadıı alǵashqy raýndtarda-aq soqqy jasaýǵa kóp mán bergen sekildi. Onyń bir ǵana soqqy jasap, jekpe-jekti aıaqtaýdy kózdegeni kórinip turdy. Al Alvares bul aıqasqa óte jaqsy daıyndalǵan eken», dedi ol. Sondaı-aq, Serik Sápıev eger qarymta kezdesý ótetin bolsa, onda otandasymyz jeńiske jetedi dep esepteıdi. О́ıtkeni, onyń jattyqtyrýshysy tájirıbeli. Aldaǵy jekpe-jegine jaqsy jospar qoıyp bere alady deıdi. Sondaı-aq, ol tóreshilerdiń sheshimi jankúıerlerdiń boksqa degen qyzyǵýshylyǵyń tómendetedi dep esepteıdi. «Tóreshiler qatelesti deıtindeı kóptegen faktorlar bar. Bul – adamı faktor. Bálkim, bireýlerge bul sheshim paıdaly shyǵar. Ár adam qatelesýi múmkin. Mundaı sheshim tek boksta emes, sporttyń ózge de túrlerinde de kezdesedi. Sheshim kóbinese tóreshilerge emes, jankúıerlerge qatty áser etedi», dedi S.Sápıev.
Sonymen qatar, otandyq telearnada Golovkın-Alvares jekpe-jeginde kommentator bolǵan Afıny Olımpıadasynyń chempıony Baqtııar Artaev ta kezdesý týraly pikirin ortaǵa saldy. Artaevtyń pikirinshe, Golovkın meksıkalyq boksshydan basymdaý bolǵan. Biraq, tóreshiler jeńisti otandasymyzǵa qımaǵan. Sondaı-aq, ol eger qarymta kezdesý ótetin bolsa, Golovkınge ońaı bolmaıtynyn aıtty. «Eger eki boksshy kelesi jyldyń mamyr nemese qyrkúıek aılarynda kezdesip jatsa, Gennadıı Golovkınge qıyndaý bolatyn sekildi. Eshqaıda bura tartpaı, ózimniń jeke pikirimdi aıtqym keledi. Onyń jasy ulǵaıǵan saıyn, ózine keri áserin tıgizedi. Al jasy kemeline kelip, ári kúsheıip kele jatqan Alvares úshin bul óte paıdaly. Ashyǵyn aıtý kerek, qarymtanyń osyndaı keri jaǵy bar. Degenmen, baǵy jansa, aýyr soqqysy bar Golovkın máseleni bir soqqymen sheship ketýi múmkin», dedi Baqtııar Artaev.
Álı BITО́RE,
«Egemen Qazaqstan»
