Prezıdentimizdiń arman-tilegi, qaırat-jigeri týǵan halqynyń aman-saýlyǵy men ósip-órkendeýine, álem aldyndaǵy mártebesiniń bıik bolýyna baǵyttalǵan.
Úndeý maqalasynyń basty ózegine aınalǵan negizgi ustanymnyń aıdary tarıhta talaı ózgeristerge ushyrap qaıta oralǵan latyn álippesine ult bolyp kóshý.
Bul – máńgilikke kóshin túzegen qazaq eliniń bilim, ǵylym salasyndaǵy ulttyq ustanymy, ómirlik qoltańbasy bolmaq. Egemen eldiń, erkin eldiń búgingi tańdaǵy qalaýy men tańdaýy osy dep bilemin.
Joldama úndeýdi tek ıdeologııa mamandaryna ǵana emes, kúlli Alash jurtyna, eńbektegen baladan eńkeıgen qart adamdarǵa arnaǵan úlken senim dep qabyldadym.
О́tken tarıhtaǵy Kúltegin babamyz tasqa jazdyryp ketkenindeı, «Elim úshin kúndiz demalmadym, túnde uıyqtamadym» degen zaman bizge endi keldi dep esepteımin. Sebebi egemendigimizdi saqtaıtyn, qorǵaıtyn, sol úshin jan aıamaı eńbek etetin ýaqyt búgin keldi dep bilemin. Ol úshin zaman talabyna saı bilimmen, álemdik ǵylymmen, ýaqyt aǵymymen órkendep ósip jatqan ozyq tehnologııany oryndy paıdalaný arqyly ǵana iske asyryp, eńbektený qajet.
Árıne, jańǵyrý úshin ulttyq kodymyzdy, ulttyq qasıetimizdi, kóp elde joq ozyq ónerimizdi ulyqtap, damytýymyz – uly mindet.
Qazaq óneri búkil álemde qanatyn keń jaıyp keledi. Onyń bolashaǵy erteń men búginnen zor bolatynyna senimim mol. О́ıtkeni bizdiń Qazaq degen elimiz bar.
Nursultan Ábishulyndaı kemeńger bastaýshymyz bar. Alla taǵala aman-saýlyǵyn berip, elimizdiń máńgilik ómir jolyndaǵy nesibesin mol etsin dep tileımin!
Eline eńbek etetin, ultynyń namysyn qorǵaıtyn árbir qazaq azamatynyń bolashaq úshin bir jeńnen qol, bir jaǵadan bas shyǵaryp, arman-tilegimizdi, osy sátti de, qasıetti iske qyzý qoldaý kórsetetin kezimiz búgin keldi demekpin.
Nurǵalı NÚSIPJAN,
halyq ártisi, Memlekettik syılyqtyń laýreaty, professor, Jambyl atyndaǵy memlekettik fılarmonııanyń ánshisi
