Atyraýda jer ýchaskelerin zańsyz ıelenip alý nemese ýaqytsha berilgen memlekettik jerdi qaıtarmaý derekteri jıi kezdesedi. Oblystyq jerdiń paıdalanylýy men qorǵalýyn baqylaý basqarmasy tarapynan júrgizilgen 477 tekserýde 418 zań buzýshylyq anyqtalǵan. Bul týraly óńirlik kommýnıkasııalar qyzmetinde ótken brıfıngte basqarma basshysy Gúlzııa Qurmanova málimdedi.
Jyl basynan beri Ákimshilik quqyq buzýshylyq týraly Kodekstiń talaptaryn buzǵan atyraýlyqtarǵa 57 mln 832 myń 307 teńge kóleminde aıyppul salyndy. Alaıda jer zańdylyqtaryna nemquraıly qaraıtyndar sany azaıar emes. Mysaly, Atyraý oblystyq kólik prokýratýrasynyń usynysymen «QazTransOıl» AQ-ǵa «Qıǵash» jelilik óndiristik stansasynda jáne Qulsary munaıótkizý basqarmasynda kólemi 59,72921 ga jer ýchaskesin zańsyz paıdalanǵandary úshin 4 764 900 teńge aıyppul salynyp, jer zańdylyǵynyń buzylýyn joıý týraly nusqama tabystalǵan.
Bul qatarda «Rıtm Oıl», «Konstrakshn KZ», «Eko Tehnıks», «AvtomırAtyraý», «Kontakt Oıl», «Merkýr Avto», «Vest Motors», «Abylaı-han», «TengızInterMunaıgazQurylys», «Qyzyl Balyq» sekildi mekemeler de bar.
«Aýyl sharýashylyǵy maqsatyna berilgen 811,4 ga jer ýchaskesi memleket qoryna qaıtaryldy. Sol sııaqty, nysanaly maqsatqa saı ıgerilmegen jer ýchaskelerin májbúrlep alý maqsatynda basqarma sot organdaryna 9 talap aryz joldady. Al jeke jáne zańdy tulǵalar tarapynan bıyl basqarmaǵa 99 ótinish tústi», deıdi G.Qurmanova.
Baqytgúl BABASh,
«Egemen Qazaqstan»
