Totamıdegi qyzý tartysta 9 salmaq dárejesi boıynsha jeńimpazdar anyqtaldy. 55 keli salmaqtaǵy úzdik oryndy elimizdiń Ulttyq qaýipsizdik komıteti komandasynyń ókili Erǵalı Nahanov ıelense, 60 keli salmaqta birinshi oryndy Ulttyq ulan jaýyngeri Baýyrjan Sultanov jeńip aldy. Al 65 kelide qytaılyq sportshymen teń urysta «Dınamo» sport klýbynyń sportshysy Shyńǵys Janǵazy jeńisti qoldan bergen joq. 70 kelide UQK sportshysy Nazarbek Zabıev jeńiske jetti.
Sondaı-aq, UQK-niń taǵy bir ókili Bekzat Bektemisov 75 kelide qarsylas shydatpady. 80 keli salmaqta Memlekettik kúzet qyzmetiniń jaýyngeri Nursultan Bekbatshaev birinshi oryndy ıelendi. 85, 90 jáne 90 keliden joǵary salmaq dárejesinde Reseı Federasııasy Ulttyq gvardııasynyń sportshylary: Rýslan Gılıazov, Roman Kopylov jáne Salımgereı Rasýlovtardyń mysy basym boldy. Osylaısha, jalpy komandalyq esepte birinshi oryndy Reseı Federasııasy Ulttyq gvardııasynyń quramasy ıelendi. Jeńimpaz komanda Ulttyq ulany Bas qolbasshysy Kýbogymen qatar 500 myń teńge aqshalaı syılyq aldy.
Al ekinshi oryn Ulttyq ulan komandasyna buıyrdy. Ulandyqtar arnaıy sertıfıkatpen qosa 300 myń teńgeni enshiledi. Úshinshi orynmen birge 200 myń teńge kólemindegi aqshalaı syıaqyny Memlekettik kúzet qyzmetiniń quramasy mise tutty.
Jeńimpazdar anyqtalǵan soń, týrnırdiń resmı jabylý saltanaty ótip, oǵan Ishki ister mınıstri, polısııa general-polkovnıgi Qalmuhanbet Qasymov, Ulttyq ulan Bas qolbasshysy general-leıtenant Rýslan Jaqsylyqov, ofıserler men sarbazdar, ózara qarym-qatynas organdarynyń basshylary, qoǵamdyq uıymdar men áskerı-patrıottyq mekemelerdiń ókilderi, mektep oqýshylary qatysty.
Sporttyq saıysqa arnaıy qonaq retinde kelgen «Rıo-2016» jazǵy Olımpıada oıyndarynyń júldegeri, boksshy Vasılıı Levıt ortaǵa shaqyrylyp, quqyqtyq tártip áskeri jaýyngerleriniń arasynda buqaralyq sportty damytýǵa qosqan úlesi úshin «Quqyqtyq tártip áskerine – 25 jyl» keýde belgisimen marapattaldy. Sportshyǵa mundaı syı-qurmetti Ulttyq ulan Bas qolbasshysy general-leıtenant Rýslan Jaqsylyqov tabys etti.
«Bul jerde sport jeńiske jetti. Elder arasyndaǵy yntymaqtastyq pen dostyq saltanat qurdy. Týrnırge qatysqan sportshylar men tóreshilerge, uıymdastyrýshylarǵa, Reseı Federasııasy, Qytaı Halyq Respýblıkasy, Qyrǵyz Respýblıkasyndaǵy áriptestirime, óz elimizdegi kúsh qurylym organdarynyń jetekshilerine alǵysymdy bildiremin», dedi ol.
Sondaı-aq, týrnır boıy ádil tórelik etken tóreshiler men úzdik óner kórsetken sportshylar da baǵaly syılyqtarmen marapattaldy.
Nurlybek DOSYBAI,
«Egemen qazaqstan»
