Mine, osyǵan oraı mańyzdy másele – sot tóreliginiń tıimdiligin, ashyqtyǵyn jáne qoljetimdiligin arttyrýǵa baǵyttalǵan «Sot tóreligi sektoryn ınstıtýttyq nyǵaıtý» jobasyn odan ári iske asyrý, sottarǵa jańa aqparattyq tehnologııalardy engizý jáne Sot tóreligi akademııasyn damytý jaıy Joǵarǵy sottyń janyndaǵy Sottardyń qyzmetin qamtamasyz etý departamentiniń basshysy Nurserik Sháripov pen Dúnıejúzilik banktiń joba jetekshisi, memlekettik sektor boıynsha jetekshi maman Valıd Malıkpen kezdesýinde jan-jaqty talqylandy.
Joba sheńberinde, joǵaryda aıtqanymyzdaı, sotty ákimshilendirý máselelerine aıryqsha nazar aýdarylyp otyr. Máselen, Dúnıejúzilik bank bólip otyrǵan qarajat esebinen sottarda qanatqaqty joba retinde jeke keńesshiler birlikteri (keńesshi, sýdıa kómekshisi, úılestirýshi) engizildi. Endi budan shyǵatyn nátıjelerdi eskere kele, elimizdiń sottarynda atalǵan laýazymdardy engizýdiń qajettiligi týraly sheshim qabyldanatyn bolady. Qazirgi tańda jobaǵa Astana qalasynyń mamandandyrylǵan aýdanaralyq ekonomıkalyq soty men Saryarqa aýdandyq soty qatysýda.
Kezdesýden keıin Dúnıejúzilik banktiń delegasııasyna Joǵarǵy sottyń Ahýaldyq ortalyǵynyń jumysy tanystyryldy. Ol tikeleı rejimde isti qaraýdyń prosestik merzim kórsetkishterin monıtorıngileýge, sot otyrystarynda aýdıobeınetirkeý qurylǵylarynyń jumysyn baqylaýǵa, sot statıstıkasyn qoldanýǵa, sotty qurmettemeý jaǵdaıy men sot prosesterine qatysýshylarǵa tóngen qaýipti tez anyqtaýǵa múmkindik beredi.
Sonymen qatar Dúnıejúzilik bank delegasııa ókilderiniń atalǵan joba júzege asyrylatyn sottarǵa barýy josparlanýda. Kezdesýge Dúnıejúzilik bank jobasyn iske asyratyn mamandar, Joǵarǵy sottyń janyndaǵy Sottardyń qyzmetin qamtamasyz etý departamentiniń qurylymdyq bólimsheleriniń basshylary jáne sot tóraǵalary men sýdıalar qatysty.
