Komıtet tóraǵasy Jeńis Nurǵalıev otyrysty asha kelip, Memleket basshysy Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» Joldaýynda agrarlyq sektordy ekonomıkanyń jańa draıverine aınaldyrý qajettigi týraly aıtqanyn eske saldy.
J. Nurǵalıev óz sózinde salanyń jaǵdaıyna taldaý jasady. Onyń aıtýynsha, aýyl sharýashylyǵy ónimderin óndirýshilerdiń kópshiligi salyq salý, sýbsıdııalaý jónindegi jańadan engizilgen erejelerdi bile bermeıdi, onyń sońy memlekettik turǵyda qabyldanǵan sharalarǵa kóńil tolmastyǵyna ákelip soǵady.
Senator atap ótkendeı, bul salalyq mınıstrliktiń jergilikti bılik organdaryndaǵy tıisti qurylymdarmen zańnamany túsindirý jónindegi qalyptasqan jumystardyń joqtyǵyn kórsetedi.
Sondaı-aq Senat depýtattarynyń aımaqtarda aýyl eńbekkerlerimen kezdesýlerinde kóteriletin máseleler de aıtyldy. Atap aıtqanda, aýyl sharýashylyǵy kooperatıvteriniń ókilderi sýbsıdııalaý men salyq salý máseleleri boıynsha olqylyqtardy kórsetip otyrady. J.Nurǵalıev bul jaǵdaıda aýyl sharýashylyǵy organdarymen qatar salyq organdary da aýqymdy túsindirý jumystaryn júrgizýi kerek dep sanaıdy.
Otyrysqa qatysýshylar aldynda Qostanaı oblysy ákiminiń orynbasary Ǵaýez Nurmuhambetov, aýyl sharýashylyǵy mınıstriniń birinshi orynbasary Qaırat Aıtýǵanov, memlekettik organdardyń ókilderi, aýyl sharýashylyǵy mekemeleriniń basshylary sóz sóıledi. Sharaǵa senatorlar Ańsar Musahanov, Bekmyrza Elamanov, Muhtar Jumaǵazıev, Dúısenǵazy Mýsın, Ábdáli Nuralıev qatysty.
Senat komıtetiniń tóraǵasy J. Nurǵalıev otyrysty aıaqtaı kelip, aıtylǵan ózekti máseleler men usynystar Parlamenttiń jáne aýyl sharýashylyǵy mınıstrliginiń jumysynda paıdalanatynyna senim bildirdi.
Sapar aıasynda parlamentshiler Qostanaı oblysynyń ákimi Arhımed Muhambetovpen kezdesip, aımaqty damytý josparymen tanysty. A. Muhambetovtiń aıtýynsha, bıyl aýyl sharýashylyǵy úshin ónimdi jyl boldy. Egin jınaý naýqany barysynda 5 mıllıonǵa jýyq astyq jınaldy. Jańǵyrýǵa jáne ónim óńdeıtin jańa óndiristiń kóbeıýine baılanysty aýqymdy múmkindikter ashylyp otyr.
Depýtattar Rýdnyı qalasynda bolyp, «Jas qanat – 2006» JShS qus fabrıkasynyń jumysymen tanysty. Kásiporyn basshysy Qaırat Maıyshev ekologııalyq turǵyda taza ónimderdi, jumyrtqa men et óndirýdi qamtamasyz etetin óndiristi damytý týraly aıtty. О́ndiristi jańǵyrtý jónindegi joba aıasynda aldyńǵy qatardaǵy eýropalyq óndiristiń tehnologııalyq jabdyqtary qoıylyp, qus sany men eńbek ónimdiligin arttyrýǵa jáne jańa jumys oryndaryn ashýǵa múmkindik berdi.
Parlamentshiler sondaı-aq «Sokolov-Sarbaı ken baıytý óndiris birlestigi» AQ karerleriniń birinde de boldy.
A. Baıtursynov atyndaǵy Qostanaı memlekettik ýnıversıtetiniń professorlyq-oqytýshylar quramymen jáne stýdenttermen kezdesý barysynda depýtattar ǵylymı jetistikter men ınnovasııalardy aýyl sharýashylyǵy salasyna engizý máselelerin qarastyrdy. Ýnıversıtet janynda qurylǵan agrotehnologııalyq habtyń keleshegine erekshe nazar aýdaryldy.
Sapar baǵdarlamasynda aımaqtaǵy birqatar kásiporyndardyń basshylarymen jáne eńbek ujymdarymen kezdesýler de bar.
