EKSPO kórmesine 8 spektakl aparyp, Astana qonaqtaryn ónerimen tánti etip qaıtqan teatr kóp jyldan beri úzilip qalǵan gastroldik saparlaryn qaıta jandandyryp, eki apta boıy Atyraý oblysyn aralap, shalǵaıdaǵy aýyl kórermenderin shabytty oıynymen súısindirip qaıtqan edi. Bul kúnderi teatrdyń jumys jospary tyǵyz bolǵany sondaı, bir kúnde tórt spektaklden qoıyp, qııandaǵy eldi mekenderdegi qarapaıym turǵyndardy qarashańyraq teatrdyń belomyrtqasy ispettes belgili ártisterimen, keıingi býyn akterlerimen jaqynnan júzdestirip, búgingi shyǵarmashylyq ujymnyń baǵyt-baǵdarymen tanysýǵa keń múmkindik syılady. Aýyl-eldi aralap bolǵan soń ile-shala ákemteatr ártisteri Ulybrıtanııaǵa attanyp ketti. Rejısser E.Obaevtyń sahnalaýymen qoıylǵan jazýshy-dramatýrg Dýlat Isabekovtiń «Jaýjúrek» spektakliniń London kórermenderine usynylýy qazaq rýhanı ómirindegi aıtýly oqıǵa retinde qabyldandy. Sebebi KSRO halyq ártisi Asanáli Áshimovtiń aıtýynsha, sonaý 1960 jyldary áıgili sahna sheberi Sháken Aımanov Shekspır shyǵarmalary negizinde uıymdastyrylǵan teatr festıvaline epızodtyq rólimen jeke-dara qatysyp qaıtqany bolmasa, áýezovtikter álemdik drama óneriniń ordasy Anglııa tórindegi teatr sahnasynda buryn-sońdy oınamaǵan.
Ulylardyń izi qalǵan ordadaǵy jetistikterdi súıinshileýmen sóz bastaǵan teatr dırektory, Qazaqstannyń eńbek sińirgen qaıratkeri Erlan Bilálov maýsymnyń ashylýyna oraı shaqyrylǵan baspasóz máslıhatynda basqa da jańalyqtarymen bólisti. Tekti ónerdiń toqsan jyldyq tórine kóterilip, ózge teatrlarǵa úlgi kórseter úlken teatr bolǵandyqtan, M.Áýezov teatry dál osy kúni Almaty qalasyndaǵy 8 teatrdyń basyn qosyp, Elbasy N.Á.Nazarbaevtyń «Rýhanı jańǵyrý» baǵdarlamasynyń jáne uly jazýshy M.Áýezovtiń 120 jyldyǵy aıasynda «Teatr álemindegi rýhanı jańǵyrý» atty teatrlar kórmesin ótkizdi. Kórmege M.Lermontov atyndaǵy orys akademııalyq drama teatry, Koreı teatry, Nemis teatry, Ǵ.Músirepov atyndaǵy Balalar men jastar teatry qatysyp, óz óner ordalaryndaǵy talanttardyń teri sińgen sahnalyq kıimderin, ártister tutynǵan buıymdar men tarıhı sýretterdi, býtaforııalyq biregeı jádigerlerdi jurt nazaryna qoıdy.
Eki aılyq demalystan soń sahnany saǵynǵan teatr akterleri qyzyl kilemniń ústimen saltanatty túrde júrip ótken soń, M.Áýezov atyndaǵy teatrdyń kórkemdik jetekshisi Asanáli Áshimov sóz alyp, lentasyn qıǵan alǵashqy kórmeni kórermender zor qyzyǵýshylyqpen tamashalady.
Sondaı-aq M.Áýezov teatry úshin bıylǵy jyl – mereıtoılar jyly. Teatr esimin tý etip ustaǵan M.Áýezovtiń 120 jyldyǵy, Múlik Súrtibaevtyń 100, Nurmuhan Jantórınniń – 90, Raıymbek Seıitmetov, Ánýar Moldabekov, Jumabaı Medetbaevtyń – 80, Ánýar Boranbaev pen Áshirbek Syǵaıdyń 70 jyldyq mereıtoılary sherý ispetti birinen soń biri osy teatrdyń tórinde atalyp ótedi.
Kórmeden soń qadym zamannan qalyptasqan dástúrine sáıkes, M.Áýezov atyndaǵy Qazaq memlekettik akademııalyq drama teatry 92-maýsymynyń shymyldyǵyn uly dramatýrgtyń «Abaı» spektaklimen ashty.
Aıgúl AHANBAIQYZY,
«Egemen Qazaqstan»
ALMATY
