«Iýgra» klýbymen ótken kezdesýde «Barys» hokkeıshileri birinshi kezeńde tórt shaıba soǵyp, qarsylastaryna esh múmkindik qaldyrmady. Oıyn bastala sala shabýylǵa kóshken Astananyń komandasy birinshi mınýtta esep ashty. Goldyń avtory – Talǵat Jaılaýov. Bul Jaılaýovtyń bıylǵy maýsymdaǵy tórtinshi goly. Al 6-mınýtta Konstantın Pýshkarev muzaıdyn ıeleriniń qaqpashysyn qapy qaldyryp, oıyndaǵy ekinshi, óziniń altynshy shaıbasyn soqty. Ár oıyn saıyn bir gol salyp júrgen «Barystyń» kanadalyq shabýylshysy Mettıý Frettın bul joly da mergendigimen kózge tústi. Esep – 3:0. Birinshi kezeńniń aıaqtalýyna 20 sekýnd qalǵanda Vladımır Markelov tablodaǵy kórsetkishti 4:0-ge jetkizip, komandasynyń jeńisi men úsh upaıyn naqtylap qoıdy.
Ekinshi kezeńniń alǵashqy 10 mınýtynda eki komandada gol soǵatyn múmkindikter bolǵan edi. Biraq qaqpashylar óz sheberlikterin kórsetip, qaýipti shabýyldardyń betin qaıtara bildi. Degenmen kezdesýdiń 34-mınýtynda Nıkıta Mıhaılıs komandamyzdyń besinshi golyn qaqpaǵa engizdi. Osy goldan soń «Barys» hokkeıshileri jeńiske jetetinderine tym qatty senim artyp ketti. Muny seze qoıǵan «Iýgra» komandasynyń bas bapkeri Anatolıı Emelın taktıkalyq ózgeris jasap, muzaıdynǵa jańa oıynshylardy shyǵardy. Nátıjesinde aıdyn ıeleri ekinshi kezeń aıaqtalýǵa úsh mınýt qalǵanda eki shaıba soǵyp úlgerdi. 37-mınýtta Ilıa Shıpov alǵashqy shaıbany salsa, 39-mınýtta Maksım Pestýshko «Iýgranyń» ekinshi golyn soqty. Úshinshi kezeńde shaıba soǵylmady. Sóıtip «Barys» syrt alańda 5:2 esebimen «Iýgradan» basym tústi.
Aıta keteıik, bul matchqa «Barys» klýbynyń negizgi oıynshylary Naıdjel Doýs, Kevın Dallmen jáne Darren Dıs jaraqattaryna baılanysty qatysa almaǵan bolatyn.
Burnaǵy kúni «Barys Arenada» Qytaıdyń «Kýnlýn Red Star» komandasymen kúsh synasqan «Barys» asa tartysty ótken oıynda 4:3 esebimen jeńiske jetti.
Birinshi kezeńnen keıin aıdyn ıeleri 2:0 esebimen jeńip jatty. Besinshi mınýtta Egor Shalapov pen 20-mınýtta Lınden Veı qarsylas qaqpaǵa shaıba salǵan bolatyn. Ekinshi kezeńde qytaılyqtar eki gol soǵyp, esepti teńestirip ketti. Kóp uzamaı olar úshinshi shaıbany salyp, alǵa shyqty. Tek kezdesýdiń aıaqtalýyna úsh mınýt qalǵanda Roman Savchenko esepti teńestire aldy. Al overtaımda astanalyq Mettıý Frettın soqqan gol «Barysqa» jeńis ákeldi.
Álı BITО́RE,
«Egemen Qazaqstan»
