«Dara» qaıyrymdylyq qory «Samruk-KazynaTrust» áleýmettik jobalaryn damytý qorynyń qoldaýymen elimizde jetinshi ortalyq ashyp otyr.
Múmkindigi shekteýli balalar úshin baǵa jetpes ortalyqtyń ashylý saltanatyna Senat depýtaty Darhan Káletaev, «Dara» qorynyń tóraǵasy Gúlnár Dosaeva, «Samruk-KazynaTrust» qorynyń bas dırektory Erlan Dárimov qatysty.
Taǵdyr tálkegine túsken búldirshinder men olardyń ata-analaryna qolǵabys beretin mundaı ortalyq Oral qalasynda tuńǵysh ashylyp otyr. Zamanaýı ǵylym men medısına jetistigin paıdalanyp, balalarǵa kásibı kómek kórsetetin mekemeni ashýǵa járdem etken barlyq mekeme-uıym jetekshilerine óńir basshysy Altaı Kólginov alǵys aıtty.
– Bıyl «Samruk-KazynaTrust» qorynyń kómegimen bizdiń óńirge balalardyń sport jáne oıyn alańdaryn salýǵa 500 mln teńge bólindi. Al erekshe muqtajdyqtary bar búldirshinder úshin ashylyp otyrǵan búgingi alańnyń mańyzy tipti erekshe. Bizdiń strategııalyq maqsatymyz – mundaı ortalyqtardyń barlyǵy erekshe bilimdi qajet etetin balalar men olardyń otbasyna qoljetimdi bolýy, dep atap ótti Altaı Kólginov.
Oral qalasynda erekshe qajettilikteri bar eki myńnan astam bala turady. Onyń ishinde 874 balanyń múmkindigi shekteýli, 400-ge jýyq bala mamandardyń kásibı kómegin qajet etedi. Jańa ortalyq kez kelgen erekshe balany jáne onyń otbasyn defektolog, psıholog, logoped, massaj, tıflopedagog, sýrdopedagog sekildi mamandardyń jan-jaqty bilikti kómegimen qamtamasyz etetin mekeme bolmaq. Jyl saıyn bul ortalyq damý múmkindigi shekteýli 150-200-deı balaǵa qyzmet kórsetpek. Qyzmettiń barlyǵy balalarǵa jáne olardyń otbasylaryna turǵylyqty jeri boıynsha tegin kórsetiledi. Oralda ashylǵan jobanyń jalpy quny 15 mln teńgege jýyq. Munda zamanaýı qural-jabdyqpen qatar erekshe qajettilikteri bar balalarǵa arnaıy bilim berý, damytý, tárbıeleý baǵytyndaǵy ádistemelik jınaqtarmen qamtylǵan arnaıy kitaphana da qyzmet etpek.
Oraldaǵy korreksııalyq kabınet jetekshisi Gúlsim Ǵalıeva qazirdiń ózinde munda estý, kórý, sóıleý, damý qabiletteri shektelgen 62 bala qabyldanyp, 16 kásibı mamannyń kómegimen túzetý jumystary bastalyp ketkenin aıtady.
Qazbek QUTTYMURATULY,
«Egemen Qazaqstan»
ORAL
Sýretti túsirgen
Temirbolat Toqmámbetov
