«Jaıylymdar týraly» Zań­ nelikten oryndalmaı otyr?

«Qurmetti Baqytjan Ábdiruly, Parla­ment­tiń altynshy shaqyrylymynyń úshinshi ses­sııa­synda Memleket basshysy qabyldanǵan zańdardyń oryndalýyn baqylaý isine aıryq­sha nazar aýdardy. Árıne Parlament qabyldap, odan Prezıdent bekitip qol qoıǵan ýaqyttan bıliktiń atqarýshy tarmaǵyna jetkenshe jáne olardyń zańnamalyq normatıvtik-quqyq­tyq qujattar qabyldaǵanynsha ájeptáýir ýaqyt ótetinin jurttyń bári de biledi. Alaı­da olardyń keıbiriniń oryndalýynyń shek­ten tys uzaq ýaqytqa sozylyp ketkenine alań­daý­shylyq týyp otyr. Máselen, Májilis depýtat­tarynyń bastamasymen ázirlenip, uzaq ýaqyt talqylanyp, qaınaýy jetken ózekti máseleni zańnamalyq turǵydan sheshýge tyrysqan «Jaıylymdar týraly» Zańnyń qabyldanǵanyna jarty jyldan artyq ýaqyt ótse de onyń áli kúnge oryndalmaı jatqanyna ne aıtýǵa bolady? 

Úkimettiń jumys reglamentiniń talap­taryna qarasaq, ortalyq jáne jergilikti atqarýshy organdar zańnamalyq normatıvtik-quqyq­tyq aktilerdi 2017 jyldyń sáýir aıy­nyń aıaǵyna deıin qabyldaýy kerek edi. Soǵan qaramaı jergilikti bılik oryn­dary aýyldyq okrýgter men aýdandyq baǵy­nys­taǵy qalalarǵa qaraıtyn jerlerdiń arasyn­daǵy jaıylymdardy basqarýdyń josparlaryn jasap, ony máslıhattardyń sessııalarynda bekitpegenin bilip otyrmyz. Mundaı qujattar jasalmasa, zańnyń normalary oryndalmaıtyny belgili. Qazir respýblıkamyzda 2548 aýyldyq okrýg pen aýdandyq baǵynystaǵy qalalar bar, búgingi kúnge deıin sonyń 175-ine ǵana atalǵan jospar jasalǵan nemese ázirlený ústinde. Bul 7-aq paıyz degen sóz. 
«Jaıylymdar týraly» Zań aýyl turǵyn­dary arasynda jaıylym jetpegen­dikten talas týdyryp otyrǵan óte ótkir máseleni sheship, mal basynyń ósýine jaǵdaı týǵyzýyna, mal sharýashylyǵy óndirisin arttyrýǵa, aýyl sharýashylyǵyna arnalǵan jerlerdiń tozýyn toqtatýǵa baǵyttalǵanyna qaramastan, osyn­daı kúı keship otyr. 

Aımaqtardaǵy aýyl turǵyndarymen kez­desý barysynda biz olardyń «Jaıylymdar týraly» zańdy, ondaǵy ózderiniń quqyqtary men múmkinshilikterin bilmeıtindigine kózimizdi jetkizdik. Kóptegen BAQ ta zańnyń oryndalmaı jatqanyn kórsetip júr. 

Osy máselelerdi eskere otyryp, Baqytjan Ábdiruly, Sizden «Jaıylymdar týraly» zań­nyń oryndalýy úshin qajetti sharalar jasaýy­ńyzdy suraımyz». 

Jeksenbaı DÚISEBAEV,
Májilis depýtaty