Aıta keteıik, Saıram aýdany Qaramurt aýyl okrýgi Jartóbe aýmaǵyndaǵy Aqsý ózeniniń jaǵalaýynda 1987 jyly Sibir jarasyn juqtyrǵan birneshe qara mal kómilgen bolatyn. Alaıda ýaqyt óte kele Aqsý ózeniniń arnasy keńip, kómindige qaýip tóný faktisi anyqtalǵan. Naqtyraq aıtsaq, kóktemgi sý tasqyny kezinde Aqsý ózeni sýy tasyp, ózen arnasyn qorǵaý maqsatynda salynǵan uzyndyǵy 200 metr, bıiktigi 2 metrdeı beton plıtalary buzylǵan. Sondaı aq, ózen arnasynan zańsyz shaǵal tas materıaldaryn alý saldarynan Sibir jarasy oshaǵy kómindisiniń ashylyp ketý qaýpi týyndaǵan. Osyǵan baılanysty taıaýda tótenshe jaǵdaılardyń aldyn alý jáne joıý jónindegi arnaıy komıssııa qurylyp, atalǵan Sibir jarasy oshaǵy kómindisiniń búgingi ahýalyn qanaǵattanarlyqsyz dep tapty.
«Bizdiń departament tarapynan Saıram aýdanynyń ákimine tıisti is-sharalardy shuǵyl túrde atqarý maqsatynda Aqsý ózen arnasynyń boıynda zańsyz jumys júrgizip jatqan karer jumystaryn toqtatý týraly usynys joldandy. Sonymen qatar mal óleksesi kómilgen aýmaqta arna túzeý jáne jaǵa bekitý jumystaryn júrgizý týraly tıisti basqarmalarǵa naqty sharalar qabyldaý qajettigi týraly tapsyrmalar berildi», - dedi Batyrǵalı Sársenbekuly.
Qazirgi tańda Saıram aýdan ákimdigimen tótenshe jaǵdaıdy jarııalaý týraly sheshim qabyldanyp, aýdan ákimi tarapynan merdiger tartylyp, tıisti jumystar júrgizilýde.
