Memleket basshysy munda eldiń mádenı-órkenıettik damýyna óz kózqarasyn bildirdi. Baǵdarlamalyq maqaladaǵy negizgi tezısterdiń biri – 2025 jylǵa qaraı qazirgi qazaq álipbıin latyn álipbıine kóshirý qajettiligi týraly. Bul aýqymdy is-shara Qazaqstannyń básekege qabilettiligin kúsheıtý jáne ulttyq biregeılikti saqtaý qajettiligi men kompıýterlik saýattylyqty joǵarylatý, shet tilderin meńgerý jáne mádenı ashyqtyqty arttyrýmen tikeleı baılanysty bolýyna negizdelip otyrǵanyn naqtylap atap ótýimiz qajet.
Elbasy óziniń eńbeginde latyn grafıkasyna kóshýdiń qalaı júrgiziletindigi jóninde naqty merzimderin belgilep, 2017 jyldyń sońyna deıin latyn álipbıiniń jańa nusqasy ázirlenetindigi jóninde baıandaǵan.
Meniń oıymsha, Memleket basshysy aldymyzǵa naqty jobalar qoıyp otyrǵanda, jergilikti atqarýshy organdar osy kezden bastap tıisti daıyndyq jumystaryna kiriskeni abzal. Qazirgi kúnde barlyq aýdan, qalalarda tilderdi oqytý ortalyqtary jumys isteıdi. Solardyń múmkindigin tolyqqandy paıdalanyp, 2018 jyldan bastap, mamandardy ázirleý jáne orta mektepter úshin oqýlyqtar daıyndaýymyz jáne barlyq uıymdastyrýshylyq jáne ádistemelik jumystardy taıaýdaǵy eki jyl ishinde júrgizýimiz qajet dep esepteımin.
Saýatty jastardy qospaǵanda, aýyldyq jerlerdegi halyqtyń basym kópshiligi latyn álipbıinen kóp habary bolmaǵandyǵyn eskersek, aınaldyrǵan 4-5 jyldyń ishinde atqarar jumys az bolmaıtynǵa uqsaıdy. Onyń ar jaǵynda 2025 jyl da qylań berip qalady. Al Prezıdentimiz «2025 jylǵa qaraı is qaǵazdaryn, merzimdi baspasózdi, oqýlyqtardy, bárin de latyn álipbıimen basyp shyǵara bastaýǵa tıispiz», degen bolatyn.
Osy jerde biz Elbasy óziniń ıdeıalaryn júıeli túrde iske asyra biletinine taǵy bir kózimizdi jetkizip otyrmyz. Esterińizde bolsa, 2012 jyldyń jeltoqsanynda Prezıdent Qazaqstan halqyna arnalǵan Joldaýynda latyndandyrý ıdeıasyn aıta kele, 2025 jyldan bastap jazýdy latyn grafıkasyna aýystyrý boıynsha jumysqa kirise berýdi tapsyryp, «Balalarymyzdyń bolashaǵy úshin osyndaı sheshim qabyldaýǵa tıispiz jáne bul álemmen birlese túsýimizge, balalarymyzdyń aǵylshyn tili men Internet tilin jetik ıgerýine, eń bastysy – qazaq tilin jańǵyrtýǵa jaǵdaı týǵyzady», degen bolatyn.
Qazirgi kúnde birqatar azamattar tarapynan latyn álipbıine ótý «ózge ult ókilderine qıyn soǵady», «olar ony qıyn qabyldaıdy» degen orynsyz pikirler aıtylatynyn estip jatamyz. Meniń oıymsha, bul durys túsinik emes. О́ıtkeni, latyn áripteri – negizinen álemniń kóptegen elderi tańdaǵan álipbıi.
Qorytyndylaı kele aıtarym, latyn álipbıine oralý – eldiń ekonomıkalyq ósýi men mádenı damýy úshin orasan zor áleýeti bar táýelsiz Qazaqstan tarıhyndaǵy eleýli betburys bolmaq!
Bastar ESQARAEV,
Ońtústik Qazaqstan oblystyq
tilderdi damytý, arhıvter men
qujattama basqarmasynyń basshysy
