Ekspedısııa óz jumysyn «Qazaqstannyń kıeli jerleriniń geografııasy» tizilimine engen «Aqmeshit» qorymynan bastady. Qorym Atyraý oblysy, Jylyoı aýdany, Aqkıiztoǵaı aýylynan 31 shaqyrym jerde ornalasqan.Bul qorymda Beket atamyzdyń ákesi Myrzaǵul, atasy Janaly, anasy Jánııa, uly Toǵaı jerlengen. «Aqmeshit» meshitiniń ımamy,Beket atanyń altynshy urpaǵy Islam qajy Myrzabekuly qarsy alyp, ata-baba rýhyna Quran baǵyshtady.Islam qajynyń aıtýynsha, Aqmeshit rýhanı, tarıhı, dinı oshaqqa aınalǵanyn, 1970 jyldan bastap Beket atamyz týraly zertteý eńbekterin jazyp júrgenin atap ótti.Beket atamyzdyń 2020 jyly ótetin 270 jyldyǵyna daıyndyq jumystary júrgizilip jatqanyn jetkizdi.
Beket atamyzdyń bes nemese jeti jerasty meshiti bar ekendigi týraly tarıhı derekter bar. Alaıda, búgingi tańda Aqmeshit, Tobyqty, Beıneý, Oǵylandy jerinde ornalasqan meshitteri jurtshylyqqa belgili. Mańǵystaý oblysy Beıneý aýdanyndaǵy borly jartastarda ornalasqan jerasty meshitiniń saqtalýyna bar jaǵdaıdy jasap otyrǵan Beket atamyzdyń altynshy urpaǵy Qalymbegi Ábýuly Táshev jerasty meshitiniń tarıhynan syr shertti.Sonymen qatar bul jerde Beket atamyzdyń aǵasy hafız Meńdiqul Myrzaǵululynyń jerlengeni jóninde ekspedısııa múshelerine aqparat berdi. Beıneý aýdanynyń ákimi Beıneýbek Ábilov ekspedısııa múshelerin qabyldap, saparǵa sáttilik tiledi.
Oǵylandyǵa baratyn saparymyzda Beket atamyzdyń ustazy Shopan atanyń zıratyna soǵyp, duǵa baǵyshtadyq. Bul jerde Shopan atanyń jary, qyzy, qaıyn atasy Baıan baba jerlengen.
Úsh júz alpys eki áýlıeniń mekenine aınalǵan Mańǵystaý dalasynyń bir qıyryndaǵy Oǵylandy shatqalynda, ózi taý ishinen qashap salǵan meshitte damyl tapqan Beket ata Myrzaǵululynyń basyna zııarat etildi. «Medınada – Muhammed, Túrkistanda – Qoja Ahmet, Mańǵystaýda – Pir Beket» degen qanatty sóz Beket atanyń áýlıelik dańqynyń aıǵaǵy.
«Nur Otan» partııasy Mańǵystaý oblystyq fılıaly tóraǵasynyń birinshi orynbasary Nurı Tumyshev ekspedısııa múshelerine sátti sapar tileı otyryp, oblys ákimi Eraly Toǵjanovtyń alǵysyn jetkizdi.
Sapar sońynda Mańǵystaý oblysy, Munaıly aýdany, Batyr aýylynda turatyn Beket atanyń jetinshi urpaǵy Berdihan Aıapbergenulymen júzdestik. Ol kisi atadan mıras bolyp kele jatqan asataıaqtyń murageri. Beket atamyzdyń Baqyrjan qajydan dáris alǵanyn, halyqtyń búginge deıin qasıetine bas ıip, qurmet kórsetkenine rıza ekendigin jetkizdi. Zamanymyzdyń zańǵar jazýshysy Ábish Kekilbaıuly «Dara Parasat, Dara Rýh, Dara Sharapat, Dara Shapaǵat ıesi» retinde baǵalaǵan Beket babamyzdyń jaýdan eldi qorǵaǵan batyrlyǵy, daýda ádiletti arashalaǵan qazylyǵy, ozbyrlyqtan obal men saýapty arashalaǵan pirádarlyǵy keleshek urpaqtyń sanasynda saqtalady dep senemin.
Ádilbek О́MIRZAQOV,
«Aqmeshit – Beket ata qorymy» ekspedısııasynyń múshesi
