Taıynsha aýdanynda turǵyndardyń oı-pikirleri men talap-tilekteri tyńdalyp, qyzmet kórsetý qyzmetiniń móldirligi men ashyqtyǵy zerdelendi. Ortalyq aýrýhananyń bas dárigeri Anatolıı Rafalskıı qyzmet kórsetýdiń elektrondy túrine kóshkeli qoljetimdiliktiń arta túskenin jetkizdi.Endi naýqastar tirkeý bóliminde burynǵydaı kezek kútip, sabylyp júrmeıdi. Munda sozylmaly dertke ushyraǵandardy saýyqtyrýǵa arnalǵan «Densaýlyq bólmesi» jumys isteıdi. Desek te, kezdesý barysynda jurtshylyqtyń memlekettik qyzmet kórsetý oryndarynyń jumysyna árkez kóńilderi tola bermeıtini ańǵaryldy.
Máselen tórt eldi mekenniń basyn toǵystyratyn Kellerovka aýyldyq ákimdigi tarapynan atqarylyp jatqan sharalar qanaǵattandyra bermeıdi. Sol sııaqty Jambyl aýdandyq halyqqa qyzmet kórsetý ortalyǵynda birqatar olqylyqtardyń oryn alǵany anyqtalyp, alys aýyldardan keletin adamdar úshin barlyq jaǵdaıdy jasaý, elektrondy qyzmetti jetildirý qajettigi atap kórsetildi.
Mamlıýt aýdanynyń turǵyndary emtıhan alý-tirkeý jáne kóshi-qon bólimderiniń jumystaryndaǵy qaǵazbastylyqqa shaǵymdanyp, qolaıly múmkindikter kórsetilse degen ótinishter bildirdi. Alık Shpekbaev Astanada bul qyzmet túrleri halyqqa qyzmet kórsetý ortalyqtaryna berilgeli qyzmet sapasynyń nyǵaıǵanyn, sondyqtan bul másele tóńireginde oılasý qajettigin alǵa tartty.
«SevKazEnergosbyt» JShS bas dırektorynyń mindetin atqarýshy Maǵaýııa Saǵyndyqov jetildirilgen qyzmet túrleri barlyq salada qoldanylatynyn áńgimelep berdi. Aıyna 25 myńnan astam tutynýshy kompanııa qyzmetine júginedi. Sall-ortalyǵy, onlaın júıesi demalyssyz jumys isteıdi.
№1 halyqqa qyzmet kórsetý ortalyǵynyń jumysy da talapqa saı uıymdastyrylǵan. Munda 500-den astam memlekettik qyzmet túri kórsetiledi. Osy jerde oblys ortalyǵyndaǵy 3 halyqqa qyzmet kórsetý ortalyǵyn bir jerge biriktirý jaıly usynystar aıtylyp, eskeriletin boldy.
Sybaılas jemqorlyqtyń aldyn alý jónindegi vedomstvoaralyq komıssııanyń kezekten tys otyrysyna agenttik tóraǵasynyń orynbasary A. Shpekbaev, monıtorıngtik toptyń músheleri, aýmaqtyq, jergilikti atqarýshy organdardyń basshylary men ókilderi qatysyp, memlekettik qyzmet kórsetý sapasyn arttyrý jaıy jan-jaqty talqylandy. Jıyndy aımaq basshysy Qumar Aqsaqalov kirispe sózben ashyp, kez kelgen quqyq buzýshylyqtardyń jolyn kesý, boldyrmaý basym baǵyt bolyp qala beretinin atap kórsetti.
A.Shpekbaev aýdandar men mekemelerde ishki taldaý júıesin júıeli júrgizý arqyly jemqorlyq sıpattaǵy keleńsiz kórinisterdi anyqtaý jaǵyna erekshe toqtalyp, zań talaptaryn múltiksiz oryndaýǵa qatysty birqatar tapsyrmalar júktedi.
О́mir ESQALI,
«Egemen Qazaqstan»
Soltústik Qazaqstan oblysy
