Foto: reuters.com
Kýveıt týy ilingen Al-Salmi tankerine jasalǵan bul soqqy 28 aqpanda AQSh pen Izraıldiń Iranǵa qarsy shabýylynan beri Parsy shyǵanaǵy men Ormuz buǵazynda saýda kemelerine qarsy zymyrandar men jarylǵysh drondar arqyly júzege asqan shabýyldardyń jalǵasy. Osy shabýyldan keıin munaı baǵasy qaıtadan kúrt ósti. Atalǵan tanker shamamen 2 mıllıon barrel munaı tasymaldaı alatyn jáne onyń qazirgi naryqtaǵy quny 200 mıllıon dollardan asady.
Kemeniń ıesi – Kuwait Petroleum Corp kompanııasynyń habarlaýynsha, shabýyl seısenbige qaraǵan túni bolǵan. Sonyń saldarynan órt shyǵyp, keme korpýsy zaqymdanǵan. Soqqydan zardap shekkender týraly aqparat túspegen. Keıinnen Dýbaı bıligi tankerge dron arqyly jasalǵan shabýyldan keıin shyqqan órttiń tolyqtaı baqylaýǵa alynǵanyn habarlady.
Munaı men janarmaı baǵasynyń qymbattaýy AQSh-taǵy úı sharýashylyqtarynyń qarjylyq jaǵdaıyna áser etip, qarasha aıynda ótetin aralyq saılaý aldynda Tramp pen onyń Respýblıkalyq partııasy úshin saıası máselege aınala bastady. Buǵan deıin olar energııa baǵasyn tómendetip, eldegi munaı-gaz óndirisin arttyrýǵa ýáde bergen edi.
GasBuddy derekterine sáıkes, dúısenbi kúni AQSh-ta benzınniń ortasha bólshek baǵasy sońǵy úsh jyldan beri alǵash ret bir gallon úshin 4 dollardan asty. Bul jahandyq jetkizilimniń qysqarýyna baılanysty AQSh munaıynyń baǵasy bir barrel úshin 101 dollardan joǵary kóterilýimen baılanysty.
Qaqtyǵysýshy taraptardyń shabýyldary báseńder emes.
Sońǵy kúnderi Iranmen odaqtas hýsıtter Izraılge zymyrandar men drondar arqyly soqqy berip, qaqtyǵysqa qosyldy. Al Túrkııa Irannan ushyrylǵan ballıstıkalyq zymyrannyń el áýe keńistigine kirip, NATO-nyń áýe qorǵanys júıeleri arqyly joıylǵanyn habarlady.
О́z kezeginde Izraıl Tegerandaǵy áskerı ınfraqurylym nysandaryna jáne Beırýttaǵy Iran qoldaıtyn «Hezbolla» uıymynyń obektilerine zymyrandyq soqqylar jasady. Sonyń saldarynan Lıvan astanasynyń ústin qara tútin torlady.
Qazaqstannyń munaıyn tasymaldaıtyn tankerler shabýylǵa ushyrady
Seısenbi kúni Izraıl qalaǵa soqqy jasalatyny týraly eskertý jasaǵannan keıin, kóp uzamaı Tegerannyń shyǵys jáne batys bólikterinde jarylystardyń daýysy estildi. Tasnim agenttiginiń habarlaýynsha, Pırýzı aýdanynda elektr qýaty óship, Irannyń Energetıka mınıstrligi ony qalpyna keltirý jumystaryn bastaǵan.
Izraıl áskeri seısenbige qaraǵan túni Lıvannyń ońtústiginde tórt sarbazynyń qaza tapqanyn málimdedi. Buǵan deıin dál osy aımaqta BUU-nyń Indonezııadan kelgen úsh bitimgeri eki bólek oqıǵada kóz jumǵan.
