Senimhat qalyptastyrý úshin «Sot kabınetinde» avtorızasııadan ótkennen keıin «Elektrondy senimhat» bólimine ótý qajet. «Senimhat» ashylǵan bette «Qosý» batyrmasyn basyp, senimhat nysanyn, sonyń ishinde ókildiń derekterin toltyrý kerek. JSN arqyly ókildiń jeke derekterin jeke tulǵalardyń memlekettik bazasynan avtomatty túrde toltyrýǵa bolady.
«Elektrondy senimhat» qyzmeti Azamattyq kodeksiniń 167-babyna sáıkes, ázirlengen, atap aıtqanda bir adamnyń (senim bildirýshiniń) óz atynan ókildik etý úshin ekinshi adamǵa (senim bildirgen) bergen jazbasha ýákildigi senimhat dep tanylady.
Al Azamattyq prosestik kodeksiniń (APK) 61-babynyń 1-bólimine sáıkes, senimhatty senim bildirýshiniń elektrondy-sıfrly qoltańbasymen kýálandyrylǵan elektrondy qujat nysanynda rásimdeý kózdelgen.
Senim bildirýshige elektrondy senimhat jasaý kezinde «Elektrondy senimhat» bóliginde iske qatysýshy tulǵalardyń APK-niń 46-babynyń 1-bóliginde jáne 60-babynyń 1-2-bólikterinde kózdelgen negizgi quqyqtaryn tizbe túrinde kórsetý múmkindigi usynylǵan, bul senim bildirýshige naqty azamattyq iske qatysý úshin senim bildirilgen tulǵaǵa usynylatyn quqyqtar sheńberin dál anyqtaýǵa múmkindik beredi.
APK-niń 58-babynyń negizinde senim bildirýshi senim bildirgen ókilge birinshi satydaǵy sotta, apellıasııalyq satydaǵy sotta, kassasııalyq satydaǵy sotta múddesin bildirý, talap aryz, shaǵymdar, ótinishter men aryzdar berý jáne qol qoıý, talap qoıýdan tolyq nemese ishinara bas tartý, talapty taný, talap qoıý talaptarynyń mánin ulǵaıtý, talap qoıý mánin nemese negizin ózgertý, azamattyq is materıaldarymen tanysý, olardan úzindi kóshirmeler jasaý jáne kóshirmelerin alý, qarsylyq bildirý, ótinishti, sonyń ishinde talap qoıýdy qamtamasyz etý boıynsha sharalardy qabyldaý týraly, dáleldemelerdi qamtamasyz etý boıynsha, qosymsha dáleldemelerdi talap etý týraly málimdeý, sot otyrysynyń hattamasymen tanysý jáne oǵan jazbasha eskertpeler berý, sot sheshimine, uıǵarymyna jáne qaýlysyna shaǵymdaný, bitimgershilik kelisim jasaý jáne basqa da quqyǵyn senip tapsyrýǵa quqyly.
Elektrondy senimhatty birneshe senimdi ókilge berý kózdelgen, óıtkeni bir is boıynsha qatysatyn senimdi ókilder sany zańnamamen shektelmegen. Elektrondy senimhatty toqtatý Azamattyq kodekstiń 170-babyna sáıkes júzege asyrylady. Ol elektrondy túrde qaralatyn bir istiń sheginde beriledi, senimhattyń qoldanylý merzimi sot aktisiniń zańdy kúshine engen jáne qujattardy oryndaýǵa berý ýaqytymen shektelgen. Osylaısha, «Elektrondy senimhat» bóliminde joǵaryda kórsetilgen negizderdi nemese senim bildirýshi bergen elektrondy senimhat merzimi aıaqtalǵanǵa deıin kúshin joıýdy sanamalaı otyryp, mindetti tártippen «Senimhat qoldanylýyn toqtatý» degen kishi bólim kózdelgen.
«Sot kabıneti» servısi iske qosylǵan sátten bastap, paıdalanýshylar onyń múmkindikterin joǵary baǵalady: halyq servısti keńinen qoldanady jáne advokattar men ókilderdiń tıimdi jumysyna járdemdesedi, azamattardyń quqyqtyq mádenıetin jetildirýge, azamattardyń óz konstıtýsııalyq quqyqtaryn qorǵaýyna yqpal etedi. Búgingi tańda «Sot kabıneti» servısine 182 670 paıdalanýshy tirkelgen.
«Egemen-aqparat»
