Saltanatty jıynǵa QR Memlekettik hatshysy Gúlshara Ábdiqalyqova jáne Eńbek jáne halyqty áleýmettik qorǵaý mınıstri Tamara Dúısenova qatysty. Atalǵan shara aıasynda Eńbek kúnine arnalǵan fotokórme, «Eńbek joly» men «Áleýmettik qorǵaý júıesiniń úzdik qyzmetkeri» baıqaýlarynyń jeńimpazdaryn marapattaý rásimi ótip, eńbek ardagerlerine qurmet kórsetildi.
Eske sala ketý kerek, Qazaqstan Respýblıkasy Prezıdentiniń «Qazaqstandy áleýmettik jańǵyrtý: Jalpyǵa ortaq Eńbek Qoǵamyna qaraı jıyrma qadam» atty maqalasynda berilgen tapsyrmalardy iske asyrý aıasynda Memleket basshysynyń Jarlyǵymen Eńbek kúni merekesi bekitildi. Atalǵan mereke óziniń adal eńbegimen egemen Qazaqstan ekonomıkasynyń damýy men qalyptasýyna úles qosqan eńbekkerlerge alǵys bildirýge arnalǵan.
Forým barysynda Qazaqstan ekonomıkasynyń órkendeýine zor úles qosqan 8 ardager «Eńbek ardageri» medalimen marapattaldy. QR Memlekettik hatshysy Gúlshara Ábdiqalyqova alǵash bolyp KSRO halyq ártisi, KSRO jáne Qazaqstannyń Memlekettik syılyǵynyń laýreaty Bıbigúl Tólegenovaǵa «Eńbek ardageri» medalin tabystady.
– Biz 2014 jyldan bastap Eńbek kúnin atap ótemiz. Bul mereke – otanymyzdyń ósip-órkendeýin qamtamasyz etetin halyqtyń eńbegine degen qurmettiń belgisi. Sondaı-aq bul kún áleýmettik jáne ekonomıkalyq jetistikterimizdi dáripteýge arnalǵan. Elimizdiń árbir azamaty adal, rııasyz, ónimdi eńbektiń mańyzdylyǵyn sanasyna sińirýi kerek. Sonda ǵana Qazaqstan álemdegi ozyq elderdiń qataryna qosylady. Keleshekte ulttyń tabystylyǵy adamı kapıtaldyń sapasymen ólshenedi, – dedi Memlekettik hatshy.
Kelesi marapattalǵan medısınalyq ǵylymdarynyń professory Maqash Alııaqparov densaýlyq saqtaý salasynda 49 jyl eńbek etip, kóptegen ǵylymı eńbekter jazǵan. Bul marapatqa, sondaı-aq, Qanshaı Joldybaeva, Serikbol Ońalov, Ánýar Túkenov, Jáken Taımaǵambetov, Nıkolaı Ýdalov, Sergeı Chekalın tárizdi aǵa býyn ókilderi ıe boldy. Osydan soń, Eńbek jáne halyqty áleýmettik qorǵaý mınıstri Tamara Dúısenova sóz aldy.
– Búgin elimizdiń ekonomıkasynyń túrli salalarynda qyzmet etip kele jatqan 8,5 mln astam azamattardyń aıtýly merekesi. Elbasy óziniń «Jalpyǵa ortaq: Eńbek qoǵamyna jıyrma qadam» atty maqalasynda álemdik órkenıettiń barlyq qundylyǵy, barlyq ekonomıkalyq jáne mádenı baılyǵy vırtýaldy qarjy ınstıtýttarynyń emes, adamnyń eńbegimen jasalady degen bolatyn. Rasynda da, egemendigimizdi alǵannan keıingi shırek ǵasyrǵa kóz júgirtetin bolsaq, elimizde 7,5 myń shaqyrym jol salynyp, 113 mln sharshy metrden astam turǵyn úı qoldanysqa berilse, 3000-ǵa jýyq mektep pen densaýlyq saqtaý nysandary salyndy. Al óndirilgen jalpy ishki ónimniń kólemi 1993 jylǵy 29,4 mlrd teńgeden byltyr 47 trln teńgege deıin jetti. Osy nátıjelerdiń arqasynda búginde Qazaq elin álemdik qoǵamdastyq naryqtyq ekonomıkadaǵy memleket retinde tanyp otyr. Bul mereke eńbekshi azamattardyń ǵana emes, búginde beınetiniń zeınetin kórip otyrǵan 2,5 mıllıonnan astam eńbek ardagerleriniń de tól merekesi, – dedi mınıstr.
«Jalpyǵa ortaq Eńbek Qoǵamy» ıdeıasyn ilgeriletý úshin, 2016 jyly Mınıstrlik eńbek áýletteri men óndiris eńbekkerleriniń arasynda ótkiziletin «Eńbek joly» respýblıkalyq baıqaýyn jarııalaǵany belgili. Saltanatty jıynda baıqaý aıasyndaǵy «Úzdik eńbek áýleti» bolyp Aqtóbe oblysyndaǵy temirjol salasynda 423 jyl shejiresi qalyptasqan Jubanyshevtar áýleti atansa, «Jas urpaqty eńbekke erekshe baýlyǵany úshin» arnaıy ataǵyn Qazaqstannyń Eńbek eri Ivan Saýer Batys Qazaqstan óńiriniń elektr mamany Tilek Harınge tabystady. «О́ndiristiń úzdik jas jumyskeri» ataǵy mektep muǵalimi Nursultan Abbasınge berildi. «Jumysshy jastardyń úzdik tálimgeri» ataǵyn Ońtústik Qazaqstan oblysyndaǵy «Qaırat» balabaqshasynyń meńgerýshisi Nurjamal Tóleýova enshiledi. Sonymen qatar, merekelik sharada, Eńbek kúni qarsańynda áleýmettik saqtandyrý júıesiniń úzdik qyzmetkerleri de nazardan tys qalmady. Olar «Zeınetaqy júıesiniń úzdik qyzmetkeri», «Áleýmettik saqtandyrý júıesiniń úzdik qyzmetkeri», «Úzdik áleýmettik qyzmetker», «Medısınalyq-áleýmettik mekemeniń úzdik qyzmetkeri», «Úzdik áleýmettik úkimettik emes uıym», «Jumyspen qamtý ortalyǵynyń úzdik qyzmetkeri», «Áleýmettik salanyń úzdik uıymdastyrýshy-menedjeri», «Medısınalyq-áleýmettik saraptamanyń úzdik qyzmetkeri» jáne «Úzdik memlekettik eńbek ınspektory» atty toǵyz atalym boıynsha marapattaldy.
Áleýmettik qorǵaý júıesi qyzmetkerleri kúni Memleket basshysynyń 2011 jyldyń 20 qazanyndaǵy Jarlyǵymen bekitilgen bolatyn. Bul Elbasynyń zeınetkerlerdiń ıgiligine qyzmet etip, múmkindigi shekteýli adamdarǵa, kóp balaly, az qamtylǵan otbasylarǵa baǵa jetpes kómek kórsetip otyrǵan azamattarǵa degen qurmeti men qamqorlyǵy sanalady. Jalpy alǵanda, respýblıkalyq forýmǵa elimizdiń barlyq aımaqtarynan 700-den asa adam qatysty.
