- Eń birinshi oıynshylaryma alǵys bildirigim keledi. Bul jeńis «Qaırat» jankúıerleriniń de jeńisi. Endi matchqa keler bolsaq, ekinshi taımda kóbirek qaýip týdyratynymyzǵa ishteı senimdi edik. «Astana» sanaýly kúnniń ishinde birneshe oıyn ótkizdi. Búgin ekinshi taımda «Astanaǵa» qıyn bolatynyn túsindik, sebebi olar sharshańqylaý boldy. Sondaı-aq, Chýma Aneneni jiberip olarǵa biraz qıyndyq týdyratynymyzǵa senimdi boldyq. Alǵashqy taımda eki komandada aıtarlyqtaı múmkindik bolmady. Oıynshylardyń báriniń oıynyna kóńilim tolady. Jastarymyz da jaqsy qyrynan kórindi. Olar negizgi qurammen oınap, úlken tájirıbe jınap júrgenin erekshe atap ótken jón. Sońǵy úsh aıda biz bárin ózgerttik. Jattyǵýymyz da ógerdi, bul sonyń nátıjesi dep aıtar edim. Endi sońǵy týrda bári belgili bolady. Biz ázirge óz jumysymyzdy oryndadyq. Árıne, sońǵy oıynymyzdy da jeńispen aıaqtaýǵa tyrysamyz.
- Búgingi jeńisten keıingi chempıondyqqa degen múmkindikterińizdi qalaı baǵalar edińiz?
- Chempıondyqtyń taǵdyry bizdiń qolymyzda emes. Bizdiń basty – mindetimiz jeńiske jetip, «Astana» men «Aqjaıyqtyń» nátıjesin kútý.
- Alǵashqy taımda amalsyzdan oıynshyńyzdy almastyrdyńyz...
- Bul sheshimimizge azdap kúmánimiz boldy. Bárin ózgertip Chýmany sol kezde-aq shyǵarýymyzǵa bolatyn edi. Biraq júıemizdi ózgertkimiz kelmedi. Oıyn júıesin ózgertpes úshin dál osy pozısııada oınaıtyn Aıbol Abıkendi shyǵarýdy jón kórdik. Abıken úmitimizdi aqtady dep senimmen aıta alamyn.
- Ne úshin Baýyrjan Turysbekti emes Chýma Aneneni shyǵarýdy jón kórdińiz? Chýma júz paıyzdyq eki sátti jiberip aldy.
- Chýma mundaı kezde kóbirek ashylyp, ózin jaqsy qyrynan kórsetedi. Ol alańnyń ashyq tusyn kórse boldy sol jerden tabylyp, shabýylymyzǵa dem beredi. Al Turysbektiń oıyn máneri sál ózgesheleý. Ol alańda keńistik bolmasa da joǵary deńgeıde oınaı alady. Biraq Chýmanyń bul kezde kómegi kóbirek tıer dep oıladym.
- «Aqtóbe» sizderge aıtarlyqtaı qıyndyq týdyrady dep aıta almaımyn. Fýtbolda qarsylasyńdy yntalandyrýǵa tyıym salmaıdy. «Aqjaıyq» óz kezeginde «Astanaǵa» ese jibermes úshin qandaı qadamǵa barasyzdar?
- Meniń basty jumysym – óz oıynshylarymdy yntalandyrý. Biz «Aqtóbeni» jeńýdi oılaımyz. Sizdiń ne suraǵyńyz kelgenin túsinbedim. Biraq «Aqjaıyq» ta, «Aqtóbede» óz oıyndaryn jeńýge tyrysady dep oılaımyn. Eger chempıondyq ataqty jiberip alsaq, «Astanany» quttyqtaýdan basqa amalymyz qalmaıdy.
- Maýsym basynan «Qaıratqa» jetekshilik etseńiz komandany chempıon eter edim dep oılaısyz ba?
- Ol týraly eshnárse aıta almaımyn. Fýtbolda ne bolaryn naqty boljaý múmkin emes. Al qazir eń bastysy – biz jarys jolyndamyz. Chempıonnyń kim bolary ázirge belgisiz.
Aıan ÁBDÝÁLI,
«Egemen Qazaqstan»
