Investısııalar jáne damý mınıstri Jeńis Qasymbek osy jyldyń toǵyz aıynda ónerkásiptik óndiristiń kólemi ótken jyldyń osy kezeńimen salystyrǵanda 5,7%-ǵa ósip, 6,5 trln teńgeni quraǵanyn málimdedi. Sondaı-aq, farmasevtıkada, jeńil ónerkásipte, metallýrgııada, mashına jasaýda, munaı óńdeýde, azyq-túlik ónimderiniń óndirisinde jáne hımııalyq ónerkásipte ósý baıqalady.
Memlekettik baǵdarlamanyń negizgi maqsatty ındıkatorlary boıynsha oń qarqyn baıqalady. Bıylǵy segiz aıdyń qorytyndysy boıynsha óńdeý ónerkásibiniń eksporty ótken jyldyń osy kezeńimen salystyrǵanda 23,1%-ǵa ósip, $9,9 mlrd qurady.
Agrohımııa, munaı óńdeý jáne qara metallýrgııa sektorlarynda eleýli ósim baıqalady. Búginde qazaqstandyq óńdeý ónerkásibi ónimderi 115 elge eksporttalady. Keıbir taýar túrleri boıynsha ótkizýdiń jańa naryqtary ashyldy.
Alǵash ret «Azııa Avto» jeńil kólikteri QHR-ǵa, «Saryarqa avtoónerkásip» — Tájikstanǵa eksporttaldy. Aýyl sharýashylyǵy mashına jasaý ónimderi — «DonMar» kompanııasy shyǵaratyn ónimder Reseı naryǵyna birneshe jyl qatarynan eksporttalýda.
Jyl saıyn 380-nen astam eksportshylar qarjylyq ári servıstik qoldaýǵa ıe bolady.
Bıyl QR UEM shıkizattyq emes eksportqa qoldaý kórsetý júıesin qurý maqsatynda Ulttyq eksporttyq strategııany ázirlep, qabyldady.
Memleket basshysynyń tapsyrmalaryn orydaý aıasynda ınvestısııalyq ahýaldy jaqsartý maqsatynda Dúnıejúzilik bankpen birlesip, 2018–2022 jyldarǵa arnalǵan Ulttyq ınvestısııalyq strategııa ázirlenip, bekitildi. Kazakh Invest ınvestısııalar boıynsha mamandandyrylǵan ulttyq kompanııasy sheteldik ókilder men óńirlik bólimsheler jelisimen qyzmet kórsetedi.
О́ńdeý sektoryna jeti jyldyń ishinde $26 mlrd-tan astam tikeleı sheteldik ınvestısııalar tartyldy. Investısııalar qurylymyndaǵy óńdeý ónerkásibiniń úlesi 2016 jyldyń qorytyndysy boıynsha 19,5%-ǵa ósti. О́sim qarqyny bıyl da saqtalyp otyr, óńdeý ónerkásibine salynǵan ınvestısııalar kólemi 3,5%-ǵa ósip, 599 mlrd teńgeni qurady.
2017 jylǵy I toqsan nátıjeleri boıynsha kásiporyndardaǵy eńbek ónimdiligi 16,1%-ǵa ósti. Negizinen ósý basymdyqty sektorlarda oryn aldy: munaı-gaz hımııasy, qara metallýrgııa, munaı óńdeý salasy.
«Shaǵyn, orta jáne iri kásiporyndar boıynsha naqty málimet osy jyldyń qorytyndysy boıynsha qalyptastyrylady. Búgingi ósý betalysyn eskergende, jyl qorytyndysy boıynsha kórsetkishter ótken jyldyń deńgeıinen tómen bolmaıtynyn boljaýǵa bolady», — dedi mınıstr.
Jalpy, óńirlerde barlyq kórsetkishter boıynsha oń qarqyn baıqalady.
J. Qasymbektiń aıtýynsha, baǵdarlamany iske asyrý ekonomıka men ónerkásip qurylymynyń ózgerýine áser etti. Máselen, óńdeý sektorynyń ekonomıka damýyna (JIО́) qosqan úlesi 2015 jyly 10,1%-dan 2017 jyldyń birinshi jartyjyldyǵynyń qorytyndysy boıynsha 11,9%-ǵa deıin, ónerkásipte – 2010 jyly 31,8%-dan 2017 jyldyń toǵyz aıynyń qorytyndysy boıynsha 40,7%-ǵa deıin, eksportta 2010 jyly 27,9%-dan 2017 jyldyń 8 aıynda 32,7%-ǵa deıin ósti.
Sondaı-aq, mınıstr baǵdarlama aıasynda jyl saıyn jańa óndirister iske qosylyp jatqanyn atap ótti.
«Barlyǵy jeti jyl jáne 2017 jyldyń 9 aıy aralyǵynda Indýstrııalandyrý kartasy aıasynda jalpy 5,5 trln teńge somasynda 1 080 joba engizildi, 101 myń turaqty jumys orny ashyldy», — dedi J. Qasymbek.
2017 jyldyń toǵyz aıynda 800 mlrd teńge somasyna 4,5 myń turaqty jumys ornyn qurýmen 52 joba engizildi. 2017 jyldyń sońyna deıin óńirlerde shamamen 10 myń turaqty jumys ornyn qurýmen 700 mlrd-tan astam teńge somasyna 80-nen astam jobany aıaqtaý josparda bar.
Sonymen qatar mınıstrdiń aıtýynsha, búgingi tańda 72 problemalyq joba jumysy erekshe baqylaýǵa alynǵan. Árbir joba boıynsha Jol kartasy ázirlengen.
«Kásiporyndarǵa ınvestorlar izdestirý, jer paıdalanýǵa kelisimge otyrý, EDB arqyly nesıelendirý, óńir kásiporyndaryna ónimderdi ótkizýge járdemdesý sekildi memlekettik qoldaý sharalary usynyldy», — dedi J. Qasymbek.
Qazirgi tańda elimizde 11 arnaıy ekonomıkalyq aımaq (AEA) jáne 22 ındýstrııalyq aımaq (IA) jumys isteıdi.
Jalpy alǵanda, AEA qurylǵan sátten bastap 682 mlrd teńgeden astam somaǵa 157 joba iske qosyldy, 11,6 myńnan astam jumys orny quryldy.
Bıyl taǵy 100 mlrd teńgege úsh myń jańa jumys ornyn qurýmen 24 jobany iske asyrý josparlanýda, jáne taǵy 20 jobanyń qurylysy bastalady.
IA alańdarynda 100 mlrd teńge somasyna 115 joba iske qosyldy, shamamen segiz myń jumys orny quryldy.
Sondaı-aq, jer telimin bólý rásimderin jeńildetýge, preferensııalar usynýǵa, ákimshilik kedergilerdi tómendetýge qatysty arnaıy ekonomıkalyq jáne ındýstrııalandyrý aımaqtary týraly zańnamaǵa ózgerister engizý boıynsha jumystar júrgizilýde.
Qorytyndylaı kele, J. Qasymbek 6 jeltoqsanda Indýstrııalandyrý kúninde osy jyldaǵy ındýstrııalandyrý jumystarynyń qorytyndysy shyǵarylatynyn habarlady.
«Biz Telekópir aıasynda jalpy somasy 399 mlrd teńgege 18 jobany iske qosýdy josparlap otyrmyz. Budan ózge, 26 joba boıynsha televızııalyq rolıterdi kórsetý josparymyzda bar», — dedi J. Qasymbek.
Otyrys barysynda, sondaı-aq, Jambyl oblysynyń ákimi Kárim Kókirekbaev, Almaty ákimi Baýyrjan Baıbek, Aqtóbe oblysy ákiminiń orynbasary, ShQO ákimi Danıal Ahmetov sóz sóıledi.
Baqytjan Saǵyntaev talqylaý qorytyndysy boıynsha osy jyldyń toǵyz aıynda ındýstrııalandyrý memlekettik baǵdarlamasyn iske asyrýda jaqsy kórsetkishterge qol jetkizilgenin atap ótti. Premer-Mınıstr jyl sońyna deıin óńirler negizgi kapıtaǵa salynatyn ınvestısııalar boıynsha artta qalýshylyqty joıyp, ózge kórsetkishter boıynsha joǵarǵy nátıjege shyǵatynyna senim bildirdi.
Premer-Mınıstrdiń birinshi orynbasary Asqar Mamınge atalǵan barlyq máselelerdi baqylaýǵa alý tapsyryldy.
