Kezdesýge Reseı Federasııasy delegasııasynyń jetekshisi Aleksandr Lavrentev, Túrkııa Respýblıkasy delegasııasynyń jetekshisi Onal Sedat, Iran Islam Respýblıkasy delegasııasynyń jetekshisi Djaberı Ansarı jáne baqylaýshy elder – Amerıka Qurama Shtattary delegasııasynyń jetekshisi Devıd Satterfıld pen Iordanııa Hashımıttik Koroldigi delegasııasynyń jetekshisi Ýasfı Tel, sondaı-aq Birikken Ulttar Uıymynyń ókili Strýgar Mılosh qatysty.
Memleket basshysy Sırııadaǵy qaqtyǵysty retteýdiń mańyzdylyǵyna toqtalyp, búkil álemdik qoǵamdastyq bul máseleniń sheshilýine zor múddelilik tanytyp otyrǵanyn atap ótti.
– Sizderdiń jumystaryńyz barsha álem nazarynda. Qaza bolǵandar men bosqynǵa aınalǵandardyń óte kóptigi búkil adamzatqa orasan nuqsan keltirdi. Qazaqstan Reseı men Túrkııa Prezıdentteriniń ótinishi boıynsha Astanada bas qosyp, kelissóz júrgizýge jaǵdaı jasady. Búginde sol kelissózderdiń jetinshi raýndy ótip jatyr. Barlyq taraptar bul úderistiń tıimdi ekenin aıtýda, – dedi Nursultan Nazarbaev.
Qazaqstan Prezıdenti Astana prosesi Jenevadaǵy kelissózderdiń tıimdiligin arttyrýǵa septigin tıgizetinin aıtty.
Memleket basshysy Astanada ótken birqatar basqosýdyń qorytyndysy boıynsha qol jetkizilgen nátıjelerge toqtaldy.
– Sizder birneshe óńirdegi áskerı is-áreketterdi báseńdetý máselesin sheshtińizder. Budan arǵy is-qımyl tetikteri ázirlenip, gýmanıtarlyq ahýal jaqsardy. Oq atýdy toqtatý rejimin saqtap qalýdyń mańyzy zor, – dedi Nursultan Nazarbaev.
Sonymen qatar, Astana prosesine qatysýshy elder delegasııalarynyń jetekshileri sóz sóıledi.
Aleksandr Lavrentev Sırııadaǵy jaǵdaıdy retteýge arnalǵan kelissózderdiń aralyq qorytyndylaryn talqylaýǵa múmkindik jasalǵany úshin rızashylyq bildirip, qaqtyǵysqa qatysty qazirgi jaǵdaıǵa óz baǵasyn berdi.
– Jumys bastalǵaly kóp ýaqyt ótti. Oń nátıjeler bar. Deeskalasııa aımaqtary eldegi jaǵdaıdyń turaqtanýyna jáne saıası retteý úderisine birtindep kóshýge kóp septigin tıgizdi. Astana prosesi aıasynda urys qımyldaryn toqtatý rejimin qatań saqtaýǵa tyrysýdamyz, – dedi Reseı delegasııasynyń jetekshisi.
Budan bólek, A.Lavrentev qaqtyǵysty retteýdiń jekelegen máseleleri jóninde áńgimelep, odan ári sheshimin tabý úshin saıası dıalogty jolǵa qoıý qajettigin atap ótti.
Túrkııa Respýblıkasy delegasııasynyń jetekshisi Onal Sedat Astanadaǵy kelissózderdiń erekshe mańyzdylyǵyna toqtalyp, osy máseleni sheshýge atsalysqany úshin Nursultan Nazarbaevqa rızashylyǵyn bildirdi.
Iran Islam Respýblıkasy delegasııasynyń jetekshisi Djaberı Ansarı terrorızmmen kúresti jalǵastyryp, óńirdegi shıelenisti báseńdetý úshin sharalar qabyldaý qajettigine basa nazar aýdardy.
Baqylaýshy elderdiń ókilderi Sırııa qaqtyǵysyn beıbit retteý úderisindegi Qazaqstannyń jáne Nursultan Nazarbaevtyń jeke rólin atap ótip, Astanada kelissózder ótkizýge múmkindik bergeni úshin alǵys aıtty.
BUU-nyń bas sarapshy-konsýltanty Strýgar Mılosh elimizdiń BUU Qaýipsizdik Keńesindegi belsendi qyzmeti úshin alǵys aıtyp, Sırııa máselesi boıynsha saıası sheshim qabyldaýdyń mańyzdy ekenin atap ótti.
Sońynda Qazaqstan Prezıdenti kelissózderge qatysqandardyń barlyǵyna óńirde beıbitshilik ornatýǵa atsalysqandary úshin taǵy da rızashylyǵyn bildirdi.
– Kez-kelgen kelissóz, dıalog – bolashaqqa bastaıtyn jol. Bárimiz bul máseleniń beıbit sheshilgenin qalaımyz. Eger barlyq elderdiń kúsh-jigerin biriktirip, ortaq koalısııa jasamasaq, terrorızmdi jeńe almaımyz. Biz kelissózderdi jalǵastyrý úshin barlyq jaǵdaıdy jasaýǵa kúsh salyp otyrmyz, – dedi Memleket basshysy.
