Shynynda da, «Qyzyq eken»

Bul «Qazaqstan» ulttyq arnasy arqyly kórermenge jol tartqan «Qyzyq eken» baǵdarlamasynyń birer sanyn kórgennen keıingi alǵan áserimizden týǵan oı. Qatyp qalǵan qasań qaǵıda, qaıtalana beretin qarabaıyr qalyp bárimizdi jalyqtyrǵaly qashan. Al «Qyzyq ekendi» kórgende qyzyqtyń ishine qalaı kirip ketkenińizdi bilmeı qalasyz. Tanym kókjıegińizdi keńeıtetin túrli vıktorınalyq suraqtar oı ormannyń arasyna alyp ketkende «eee rasynda solaı eken ǵoı» dep tańyrqaısyz.

Álem­niń ár túkpirinde bolyp jatqan túrli qyzyqtarǵa saıa­hat jasap, sanańyzǵa múlde kirip shyqpaǵan tyń aqparatqa qany­ǵasyz. Baǵdarla­manyń biz baıqaǵan bas­ty ereksheligi – bir qalyppen shektelip qalmaı kórermendi san qyry­nan tarta bilýinde. Bilim qor­jy­nyńyzdy molaıtatyn aǵyl-tegil aqparat, oılaý qabiletińizdi arttyratyn logıkalyq saýaldar, ádemi astarly ázil, shyǵarmashylyq erkindik, tanymal tulǵalardyń oı-óresin kórsetip jańa qyrynan ashý syndy birneshe baǵyt bir baǵdarlamanyń óne boıynan tabylady. Eń bastysy, barlyq jastaǵy kórermenniń talǵamyna saı. Jobanyń tabıǵatynan keıbir shoý-baǵdarlamalardaǵydaı shekten tys usaqtyq, arzan sóz, ájýa áńgime kórmeısiz.

Otandyq telekeńistikte kóptegen týyndylarymen tanylǵan Serik Aqyshev jetekshilik etetin jobany tanymal telejúrgizýshi Rahman Omar júrgizedi. Baǵdarlama jelisi, júrgizýshiniń sóz saptaýy, stýdııa qonaqtarymen tyǵyz baılanys, bári ádemi úılesim tapqan. «Ǵalam ǵajaıyptary», «Sen bilesiń be?», «Qazaq sporty», «Tulǵa», «Zert­­teý» sııaqty ár shyǵarylym sa­ıyn aýysyp otyratyn aıdarlar kóp­tegen tarıhı derekterden, qy­zyq­ty jańalyqtardan syr shertedi.

Tek, úlken-kishini tegis baýrap alatyn halyqqa paıdasy mol tanymdyq joba jurttyń bári jumystan qaıtyp otbasy músheleri ekran aldyna túgel jınalatyn keshki ýaqytta kórsetilse degen oı mazalaıdy. Kóp bilý adamzat úshin eń asyl qazyna desek atalǵan joba­nyń negizgi maqsaty «Tal besikten, jer besikke deıin bilim al» degendi ún­deı­tindeı. Sebebi dúnıede biz bil­meıtin qyzyqtar men qupııa­lar óte kóp. Bilýge qumartqan jas óren­­derdi jalyqtyryp almaı ár qy­zyqty aqparatty zamanǵa saı ıkem­dep jeńil ári áserli jetkizetin «Qyzyq eken» sııaqty jańasha tur­pa­ttaǵy tanymdyq dúnıeler kóp bolsa eken deısiń. Siz ne kórip júrsiz kórermen?

Arman OKTIаBR,

«Egemen Qazaqstan»

ALMATY