Ol 2016-2019 jyldarǵa arnalǵan «Densaýlyq» memlekettik baǵdarlamasynyń basym baǵyttarynyń biri – qoǵamdyq densaýlyq saqtaý qyzmetin qurý ekenin atap ótti. Ony qurýdyń maqsaty qoǵamdyq densaýlyq saqtaý máseleleri boıynsha múddeli taraptardyń kúsh-jigerlerin biriktirý bolyp tabylady. Qoǵamdyq densaýlyq saqtaý júıesiniń mindeti
aýrýdyń aldyn alý jáne qoǵamnyń densaýlyǵyna memleket pen halyqtyń ortaq jaýapkershiligin arttyrý bolyp tabylady.
«Sońǵy jyldary Qazaqstanda sozylmaly ınfeksııalyq emes aýrýlardy dıagnostıkalaýǵa jáne emdeýge shyǵyndardyń óskeni baıqalady. Bul memlekettiń densaýlyq saqtaýǵa baǵyttalǵan barlyq shyǵyndarynyń 95-96 paıyzyn quraıdy, al profılaktıkaǵa 3 paıyz ǵana jumsalady. Osyǵan baılanysty, kúndelikti ádetterdi qalyptastyrý maqsatynda ár qazaqstandyq úshin ómirdiń sapasy men uzaq ómir súrýdiń kepili bolatyn tıimdi sharalar qabyldaý qajet. Osy sharalarǵa qoǵam kóbirek qarajat jumsaýy kerek. Sol kezde memleket pen halyq aýrýlardy emdeýge az qarajat jumsaıtyn bolady», dep atap ótti A.Esmaǵambetova.
Sondaı-aq 2016 jyly DDSU sarapshylarymen birlesip qoǵamdyq densaýlyq saqtaýdyń negizgi qyzmetiniń ózin ózi baǵalaýy júrgizilgenin habarlady. Zertteýdiń nátıjeleri kúshti jáne álsiz taraptardy aıqyndady. Tolyq zańnamalyq jáne normatıvtik bazanyń bolýy, «Densaýlyq» memlekettik baǵdarlamasynyń iske asyrylýy, memlekettik qarjylandyrý jáne profılaktıkalyq is-sharalardyń iske asyrylýy qoǵamdyq densaýlyq saqtaý máselelerinde jetistikterge jetýge múmkindik bergenin málimdedi.
«Júrgizilgen baǵalaýdyń nátıjelerin, sondaı-aq qoǵamdyq densaýlyq saqtaý máseleleri boıynsha múddeli taraptardyń kúsh-jigerlerin biriktirý qajettiligin eskere otyryp, osy jyly Qoǵamdyq densaýlyq saqtaý qyzmeti quryldy. Densaýlyq saqtaý mınıstrliginiń jáne barlyq óńirlerdiń densaýlyq saqtaý basqarmalarynyń qurylymdyq bólimsheleri quryldy. Qyzmettiń jumysy sábılerdi vaksınasııalaý men mektep medısınasynan, saý minez-qulyqtan, ekologııalyq qaýipsizdikten, jastar men eresekter arasynda eńbek gıgıenasynan bastap tamaqtanýdy ońtaılandyrý men qart adamdarda sozylmaly degeneratıvti aýrýlardyń aldyn alýǵa deıingi ómirdiń barlyq kezeńine baǵyttalǵan. Munyń barlyǵy qazaqstandyqtardyń ómir súrý uzaqtyǵyn ulǵaıtý jáne turmys sapasyn jaqsartý boıynsha Elbasynyń qoıǵan mindetterin oryndaýǵa baǵyttalǵan», dedi ol.
Raýan QAIDAR,
«Egemen Qazaqstan»
