1917 jylǵy Alash qozǵalysynyń 100 jyl tolýyna jáne Qazaqstan Respýblıkasy táýelsizdigi merekesine oraı uıymdastyrylyp otyrǵan alqaly jıynǵa memleket jáne qoǵam qaıratkerleri, elimizdegi joǵary oqý oryndarynyń qyzmetkerleri, tanymal tarıhshylar men belgili ǵalym-zertteýshiler qatyspaq.
Konferensııanyń alǵa qoıyp otyrǵan negizgi maqsaty – jahandaný jaǵdaıyndaǵy qoǵamnyń rýhanı jańǵyrý máselesi men Alash murasy sabaqtastyǵyn aıqyndaý jáne ult-azattyq qozǵalysyn ǵylymı turǵydan naqtylaý.
Keńes jumysy «Alash Orda jáne qazaq memlekettiligi máseleleri», «Alash qaıratkerleriniń shyǵarmashylyq murasynyń urpaq tárbıesindegi róli» jáne «Rýhanı jańǵyrý jaǵdaıynda gýmanıtarlyq bilim berý isin jetildirý» atty baǵyttar boıynsha júrgiziledi.
Jıyn barysynda Alash qozǵalysy tarıhynan syr shertetin kitap kórmesi uıymdastyrylyp, kelip túsken materıaldar negizinde arnaıy jınaq shyǵarylmaq.
– Alash qozǵalysy – el muratyn saıasat pen rýhanııat turǵysynan aıqyndap, qazaqtyń memleket qurý tájirıbesi men memleketshildik múddesiniń úzilmegen altyn arqaýy. Alash qozǵalysy sııaqty tól tarıhymyzdaǵy asa iri oqıǵaǵa qatysty máselelerdiń barlyǵyna shynaıy, tolymdy ári naqty baǵa berilýi qajet. Alash Ordanyń ǵıbraty, qaıratkerlerimizdiń júrip ótken joly –táýelsiz el bolǵan qazaq halqyna taǵylym bolýy tıis. Ult zııalylarynyń egemendik jolyndaǵy kúresiniń salmaǵy men baǵasyn uǵynǵan saıyn biz búgingi kúnniń mán-maǵynasyn tereń sezine túsemiz. Bul eń aldymen óskeleń urpaq úshin, qazaq eliniń ómirsheńdigi úshin asa qajetti hám mindetti qasıetti qadam bolmaq, – deıdi shara uıymdastyrýshylary.
