Semeıde tehnıkalyq mamandarǵa suranys bar

Qazir qandaı tehnıkalyq mamandyqtar qajet ekendigi jalpy kásipkerlikti damytýǵa jáne jumyssyzdyqtyń aldyn alýǵa arnalǵan memlekettik baǵdarlamalar arqyly anyqtalýda. Búginde gazben jáne elektrmen dánekerleýshiler men avto­elektrıkter asa qajet. Respýblıkalyq bıýdjetten osy mamandyqtarǵa qaıta oqytý úshin 300 mıllıon teńge bólingen. Máselen, qala turǵyny Anatolıı Gýbkovtyń mamandyǵy – qurylysshy. Ol óz mamandyǵyna saı jumys taba almaı, úsh aı boıy aıaǵynan taýsylady. Sóıtip qala ákimdigine qarasty bólim arqyly qysqa merzimdi kýrsta oqyp shyǵýǵa bolatyndyǵyn estıdi. Mine, ol birneshe apta boıy gaz elektrmen dánekerleýshi mamandyǵyn meńgerýde. 

– Qurylys – maýsymdyq jumys. Bizdiń óńirde qysta qurylys toqtap qalady. Sondyqtan osy oqyp jatqan mamandy­ǵym tıimdi dep oılaımyn. Úıretýshilerimiz óte jaqsy. Stıpendııa beredi, – deıdi ol. 

Jalpy, memlekettik baǵdarlama aıasynda qaıta oqytý kýrstarynan 1500 adam ótpek. Oqytý kýrstary jyl sońyna deıin aıaqtalady. Qaladaǵy 16 kolledj boıynsha 33 mamandyqta oqýǵa múm­kindik bar. Qaladaǵy jumyspen qamtý ortalyǵyndaǵy kásibı oqytý bólimi­niń bastyǵy A.Býrahanovanyń aıtýyn­sha, baǵdarlama boıynsha oqıtyndar tegin bilim alady. Aıyna 16759 teńge stıpendııa beriledi. Al qala syrtynan kelýshiler qosymsha páteraqylaryna tóleý úshin 11345 teńge alady. 

– Qazir TJO-da avtoelektrık bolyp jumys isteımin, deıdi Jenıa Lytkın, – jańa mamandyǵym kóńilim­nen shyqty. Taǵy da bilimimdi jetil­dir­gim keledi. 

Jumyspen qamtý ortalyǵy jumys berýshilerdiń de tapsyrystaryn izdep otyr. Gaz elektr dánekerleýshi, avtoelektrıkterden bólek et bólýshi kási­bin meń­gergenderge suranys bar. Elbasy  Jol­daýynda kásiptik bilim berý baǵyt­tary­na erekshe toqtalǵan.  Kásiptik-tehnıkalyq bilimdi jastar jaqsy meńgerý úshin «Qazaqstan-2050» Strategııasynda: «Biz­diń jastary­myz oqýǵa, ǵylym-bilimdi ıgerýge, jańa mashyqtar alýǵa, tehnologııany kún­delikti ómirde sheber de tıimdi paı­da­lanýy tıis. Biz bul úshin barlyq múm­kindikti jasap, eń qolaıly jaǵdaı­men qamtamasyz etýimiz kerek. Bizdiń bas­ty maqsat – 2050 jyly myqty memleket, damyǵan ekonomıka jáne jal­py­ǵa ortaq eńbektiń negizinde berekeli qoǵam qurý», degen edi. Halyqqa tegin kásiptik-tehnıkalyq bilim berý búginde naryq suranysyna saı júrgizilýde.

Raýshan NUǴMANBEK,
jýrnalıst

SEMEI