Sábına Ázimbaeva baıqaý shartyna oraı keler jyly 18 jasqa tolǵanda ǵana baıqaýǵa qatysa alady. Jas shamasyna qoıylǵan talaptarǵa baılanysty arýlardyń oryndary aýystyryldy.
Bastapqyda «Álem arýy» dodasy 2018 jyldyń qańtarynda Fılıppınde ótkiziledi dep josparlanǵan edi. Sońǵy sátterde jarys bıylǵy 26 qarashada Las-Vegasta ótkiziledi degen sheshim qabyldandy.
Sol sııaqty «Qazaqstan arýy-2016» atanǵan qyzylordalyq Gúlbaný Ázimhanova da Qazaqstan atynan Qytaıdyń Sanıa qalasynda ótken álemdik sulýlyq baıqaýynda júrgenin habarlaǵan bolatynbyz.
Al Kámıla qatysatyn «Álem arýy» (MissUniverse) – jyl saıyn ótkiziletin sulýlyq jarysy. Bul álemdegi eń bedeldi sulýlyq baıqaýlarynyń biri. Sonymen baıqaýda baǵy tasyp, sulýlyq tájin kıgen jeńimpaz qyzben jyldyq kelisimshart jasalady. Ol arý qaıyrymdylyq jáne jarnamalyq maqsatta búkil álemdi aralap shyǵady. О́tken jyly «Álem arýy-2016» ataǵyn fransııalyq Irıs Mıttener jeńip alǵany aıan.
Al Kámıla Ásilova respýblıkalyq Estrada-sırk kolledjin horeograf mamandyǵy boıynsha támamdaǵan. О́ziniń bı stýdııasyn ashýdy armandaıtyn arý Qazaqstan atynan osyndaı aýqymdy baıqaýǵa qatysý baqytyna ıe bolǵanyna, árıne qýanyshty.
– Bul meniń bala kúngi armanym bolatyn. Ata-anama álemdik baıqaýǵa baratynymdy aıtqanymda, olar da qýanyp, meni maqtan tutatyndaryn bildirdi. Anam kishkentaı kezimde «Arman-tilekter kartasyn» salǵanymdy, sol jerdegi armanymnyń biri sulýlyq baıqaýymen baılanysty bolǵanyn esime túsirdi. Armandar oryndalady, – deıdi kórikti Kámıla.
Qazir boıjetken úlken synaqtarǵa toly saparǵa daıyndalyp jatyr. Kámılaǵa «Qazaqstan arýy-2007» baıqaýynyń jeńimpazy Alfına Nasyrova kómektesip júr. Alfınanyń halyqaralyq baıqaýlarǵa qatysýda aıtarlyqtaı tájirıbesi bar. Ol «Álem arýy-2008» baıqaýynda top jarǵan úzdik 15 arýdyń qataryna engenin umytpaǵandar tabylar.
«Alfına maǵan barynsha kómektesip jatyr. Keńesin aıamaıdy, ózimdi qalaı ustaýym kerektigin úıretedi. Kúnde sabaq alamyn, kıim ólsheımiz, usaq-túıekterge deıin tańdaımyz, talqylaımyz. Men oǵan óte rızamyn», dedi tileýlesterine Kámıla.
Aınash ESALI,
«Egemen Qazaqstan»
ALMATY
