2014 jyly «Astanany» eki oıynnyń nátıjesinde 7:0 qylǵan «Vılıarreal» «Astana Arenaǵa» taǵy keldi. Bul joly ıspanııalyqtar negizgi quramda óner kórsetetin birneshe fýtbolshylaryn alańǵa shyǵarmady. Sebebi, «súńgýir qaıyqtylar» Eýropa lıgasynyń pleı-off kezeńine shyǵatyndaryn bilip keldi. Tipti, osy oıynda teń nátıje tirkelse, ıspanııalyqtarǵa sonyń ózi de maqsatty oryndaǵanmen teń edi.
Negizgi shabýylshy Sedrık Bakambıý qosalqy quramda qaldy. Fransııalyq shabýylshy bıylǵy maýsymnyń ózinde 8 gol soǵyp qoıǵan. Qorǵaýshy Jaýme Kosta, jartylaı qorǵaýshy Semý Kastıleho da negizgi quramnan oryn ala almady. Munyń barlyǵy bas bapker Kalehanyń jasaǵan ózgeristeri. Úsh sheptegi úsh myqtysyn saqtap qaldy. Sebebi, 26 qarasha kúni «Vılıa» «Sevılıamen» kezdesedi. Osy oıyn olarǵa mańyzdyraq boldy.
Match bastalysymen Ivan Maevskıı áriptesteriniń qatelikterin jýyp-shaıamyn dep jıi oıyn tártibin buza berdi. Matchtyń birinshi taımy jalpy aıtqanda fızıkalyq turǵyda oıynshylardyń shamalas ekendikterin kórsetti. Baıqaýsyzda kelip qalǵan dopty shıire tepken Kabananga esep ashty. Bul gol onsyzda shabyttanyp júrgen shabýylshyny odan ári arqalandyrdy. Ol osy matchta qaptal arqyly oınady. Chempıondar lıgasynda ol ıspanııalyq «Atletıko», túrkııalyq «Galatasaraıǵa» qarsy oıyndarda dál osylaı qaptaldaǵy vıngerdiń rólin oryndady. Stanımır Stoılovtyń Djýnıordy osyndaı myqty qarsylastarǵa qarsy oıynda da qaptalǵa tastaıtyny bar. Sebebi, ortalyq shabýylshy shyǵaratyndaı keńinen kósile almaıtynyn biledi. Bolgar bapkerine meılinshe bir adamnyń artyqtyǵyn jasaý qajet boldy. О́ıtkeni, Bakka men Sansoneniń qımyldaryna qarsy turatyn bir-bir qorǵaýshydan qajet. Qorǵanysqa qaraı bir adam qajet bolǵandyqtan Kabananga shetke ysyryldy. Birinshi taım aıaqtalǵansha jeńisti esepti jigitter ustap tura almady. Buryshtama kótergen Tvýmasıdiń doby «Vılıarreal» qaqpashysynyń qolynan tabyldy. Ol birden Bakkaǵa laqtyrdy. Kolýmbııalyq surmergen ádemi paspen Rabany Erıchpen betpe bet shyǵardy. Esep 1:1. Bul goldyń soǵylýyna nebári úsh qana aıaqtyń janasýy jetkilikti boldy.
Ekinshi taımnyń 60-mınýtynda alańǵa Sedrık Bakambıý shyqty. О́tken jolǵy bir apta burynǵa matchta «Astana» esepti teńestirgen kezde de bapker amalsyz Sedrıkti shyǵarýǵa májbúr bolǵan. Bul joly da solaı. Fransýz kánigi tisqaqqan shabýylshy ekendigin dáleldep, 5 mınýttan keıin ıspanııalyqtardy alǵa shyǵardy. Al 83-mınýtta ol dýbl jasap, matchtyń taǵdyryn sheshkendeı boldy. Osy kezde «Shanshardaǵy» álgi Sholpannyń sózi eske túsedi - «ol profesıonal ǵoı, aqshasyn alady da ketedi».
Qorǵanystaǵy qatelikti jaqsy paıdalanǵan Tvýması bıylǵy Eýropa lıgasyndaǵy 4-golyn soǵyp, bir jelpindi. Qorytyndy esep 2:3, «Vılıarrealdyń» jeńisi.
«Astana» (Astana, Qazaqstan) — «Vılıarreal» (Vılıarreal, Ispanııa) 2:3 (1:1)
Goldar: Kabananga 22 (1:0), Raba 40 (1:1), Bakambıý 65 (1:2), Bakambıý 83 (1:3), Tvýması 88 (2:3)
Árıne deńgeıdiń aty deńgeı. Degenmen, birshama ýaqyt terezesi teń oınaǵan «Astanaǵa» rahmet, sondaı múmkindikti bergen «Vılıarrealǵa» da rahmet. Al bir ókinishtisi elordalyq «Astana» óz úıindegi oıyndardaǵy jeńilissiz serııasyn úzip aldy. «Vılıarrealdan» keıin bastalyp edi, ózderi kelip aıaqtap berdi. Qyzyqty oıynnyń áseri osy. Endi elordalyq ujym «Slavııa» Praga komandasynyń aıaq alysyna qaraıdy.
Ermuhamed MÁÝLEN,
«Egemen Qazaqstan».
