Iá, bul Elbasy N.Nazarbaevtyń «Uly dala ulaǵattary» atty eńbeginiń altynshy bóliminen alynǵan úzindi. Ońtústik Qazaqstan oblysynyń ákimi Janseıit Túımebaev óńirimizdegi aqsaqaldar men zııaly qaýym ókilderiniń basyn qosyp ótkizgen dóńgelek ústel barysynda da jastarǵa jón kórsetýde aqsaqaldyq qasıettiń attan túspegenin qalaıtynyn jetkizdi. Sondaı-aq aǵa býynǵa Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý maqsatynda 66 joba boıynsha 121 is-sharany júzege asyrý qolǵa alynǵanyn aıtyp, atqarylǵan jumystar jóninde aqparat berdi.
«Sizderdi Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasyn birlese júzege asyrýǵa shaqyramyn. Aldaǵy kezde biz de talapty kúsheıte túsemiz. Oblystaǵy 720 myńnan astam jyljymaıtyn múliktiń kelbetin kóriktendiremiz. Álbette, bul rette sizderdiń kómekterińizge súıenetin bolamyz. Jastarymyzdyń tálim-tárbıesine, bilimine asa kóńil bólýimiz qajet. Osy turǵyda sizderdiń qosar úlesterińiz orasan zor. «Qarty bar el – qazynaly el» degendeı, sizder bizdiń qazynamyz bolýmen qatar, baǵyt-baǵdar beretin danalyqtyń sarqylmas bulaǵysyzdar», dedi Janseıit Qanseıituly.
Oblysta Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý maqsatynda 844 eldi mekende 3185 is-shara ótkizilgen. Maqalada erekshe atalǵan jobalardy júzege asyrýǵa 2022 jylǵa deıin 16,2 mlrd teńge bólý josparlanyp otyr. Búgingi kúnde kásipkerler, demeýshiler tarapynan jalpy 30 mlrd 350 mln teńgeni quraıtyn 529 óńirlik joba qolǵa alynyp otyr.
Budan bólek, «Rýhanı qazyna» kishi baǵdarlamasy boıynsha «Ajarly úı – yrysty» jobasy aıasynda 120-dan astam belsendi, erikti jastar eldi mekenderdi abattandyrý maqsatynda kómekke zárý 543 otbasynyń aýlalaryn tazalap, qorshaýlaryn, qaqpalaryn syrlap, aýyl ajarynyń artýyna óz úlesterin qosqan. «Rýhanı jańǵyrý: Bereke basy – birlik» taqyrybynda ótken kezdesýde oblystyq ardagerler keńesiniń tóraǵasy Jeńisbek Máýlenqulov baıandama jasap, eldi birlik pen yntymaqqa shaqyrýda ardagerlerdiń eńbegi orasan ekenin atap ótti. Sondaı-aq ardagerlerdi baǵdarlamalyq maqalanyń el arasynda óz deńgeıinde nasıhattalýyna kúsh salýǵa shaqyrdy.
Ǵalymjan Elshibaı,
«Egemen Qazaqstan»
