«Qaırat» ÝEFA kýbogynyń elıtalyq kezeńindegi oıyndaryn Ispanııanyń Torrehon-de-Ardos qalasynda ótkizdi. Alǵashqy týrda Almatynyń komandasy Rýmynııanyń «Deva» klýbyn 5:2 esebimen jeńip, irikteýdi jeńispen bastady. Goldardy «Qaırat» sapynan Leo men Hosseın Taıebı eki-eki goldan soqsa, qaqpashy Igıta bir dopty óz enshisine jazǵan edi.
Ekinshi týrda «Qaırat» Portýgalııanyń «Braga/AAÝM» komandasymen kúsh synasyp, 4:1 esebimen esh qıyndyqsyz jeńiske jetti. Bul oıynda Taınan dýbl avtory atansa, Marınıý óz qaqpasyna gol soǵyp aldy. Al «Qaırattyń» tórtinshi golyn qaqpashy Igıta saldy.
Sondaı-aq, Ispanııanyń 21 dúrkin chempıony «Inter-Movıstar» komandasy «Braga/AAÝM» (Portýgalııa) men «Deva» (Rýmynııa) klýbtaryn asa qıyndyqsyz utty. Sóıtip, «Qaırat» pen «Inter-Movıstar» toptaǵy birinshi oryndy ıelený úshin ózara kezdesýde sarapqa salý kerek boldy. О́z elderiniń eń úzdik komandalary bir jyldyń ishinde osymen ekinshi ret kezdesti. Atalǵan eki ujymnyń alǵashqy teketiresi bıyl Almatyda ótken Tórttik fınaldyń jartylaı fınalynda bolǵan. Sol kezde Ispanııa ujymy 3:2 esebimen basym túsken-di. Araǵa jeti aı salyp eki komandanyń joly Tórttik fınalǵa joldama berýshi sońǵy irikteýde túıisti. Ekinshi kezdesýde de «Inter-Movıstar» komandasy «Qaıraty» taǵy da qapyda qaldyrdy. Bul jolǵy esep – 5:3. Tórttik fınaldyń eki dúrkin jeńimpazy «Qaırat» 2016/17 maýsymda «Interge» jibergen esesin qaıtarýǵa tyrysqanymen, Pıreneı túbeginen kelgen komanda bıyl da óziniń myqty ekenin dáleldedi.
Endi oıynǵa az-kem toqtalyp ótsek. Tartysqa toly, fınalǵa bergisiz ótken matchta «Inter» gol soqsa, «Qaırat» birden jaýap qatyp, dop dodasynyń kórkin keltirdi. Birinshi taımda teń esep 3:3 nátıjesimen aıaqtaldy. Ekinshi taımnyń orta tusyna qaraı oıynda shıelinisti, daýly jaǵdaı kóbeıe tústi. Áýeli «Qaırat» klýbynyń prezıdenti Qaırat Orazbekov pen bas bapkeri Kakaý alańnan qýyldy. Arada az ýaqyt ótken soń qaqpashy Igıta tártip buzyp, ekinshi sary qaǵazyn aldy. Sóıtip, ol da oıyndy alań syrtynan tamashalaýǵa májbúr boldy.
San jaǵynan basymdyqqa ıe bolǵan «Inter» kóp sozbaı, tórtinshi golyn soqty. Oıyn sońyna qaraı alań ıeleri eki ret 10 metrlik aıyp soqqysyn oryndaýǵa múmkindik aldy. Alǵashqysy qaqpadan qıys ketse, ekinshisinde Gadeııa pármendi soqqysymen Dýdýdy qapy qaldyrdy. Osy goldan soń «Qaırat» birdi-ekili shabýyl jasap kórgenimen, bári nátıjesiz aıaqtaldy. Al matchtyń aıaqtalýyna 22 sekýnd qalǵanda, almatylyq ujym jeńilgenderin moıyndap, dop tebýdi qoıdy. Sebebi, qalǵan ýaqytta úsh gol soǵý múmkin emes bolatyn.
Oıynnan soń, komanda kapıtany Dinmuhamed Súleımenov bul matchta jeńilgenderin tolyq moıyndady. Onyń aıtýynsha, «Inter» klýby «Qaıratty» tóreshilerdiń kómeginsiz-aq jeńýge qaýqarly bolǵan. «Oıyn óte aýyr ótti. «Inter» óte myqty komanda, olar bizdi tóreshilerdiń kómeginsiz-aq jeńetin edi. Tóreshi klýb prezıdenti men bas jattyqtyrýshymyzdy alańnan ne úshin qýǵanyn álige deıin túsine almaı júrmin. Onyń bul sheshimi oıynnyń búkil qarqynyn buzdy», deıdi D.Súleımenov.
Al «Qaırattyń» brazılııalyq legıoneri Aleshandre Súleımenovtiń sózimen kelispeıtinin, tóreshi «Interge» kómekteskenin, ádil tórelik etpeı, oıynnyń shyrqyn buzǵanyn aıtady. «О́kinishke qaraı, Tórttik fınalǵa shyǵa almadyq. Biz jeńiske jetýge bar kúshimizdi saldyq, biraq oıyn biz kútkendeı bolmady. Oıynda gol soǵatyn birneshe múmkindikterimiz boldy. Biraq, álemniń eń úzdik komandasyna ese jibergenimizdi túsinýimiz kerek. Bul oıynda tóreshi «Interge» ashyq jaqtasty. Birneshe kúmándi sheshim qabyldady. Mysaly, Gadeııa ashyq tártip buzǵanda qyzyl, eń qurǵanda sary qaǵaz berý kerek edi. Biraq, tóreshi únsiz qaldy. Al Leo dál sondaı ereje buzǵanda oǵan sary qaǵaz kórsetti. Bizdi Tórttik fınaldan «Inter» emes, tóreshi shyǵaryp jiberdi desek durys shyǵar», deıdi ol.
«Inter» – óte tájirıbeli jáne úzdik komandalardyń biri. Esep 3:4 bolǵanda bizdiń gol soǵyp, jeńiske jetetin birneshe múmkindigimiz boldy. Biraq, sony tıimdi paıdalana almadyq. Birinshi taımda biz óte kóp óreskel qatelikter jiberdik. Úsh goldyń ekeýi qorǵanystyń qateliginen qaqpamyzǵa endi. Degenmen, shákirtterim jaqsy oıyn kórsetti. Tóreshi meni alańnan ne úshin qýǵanyn túsinbeımin. Barlyǵy oıyn jaǵdaıynda bolǵan edi. «Inter» jaqsy komanda, dese de kórermender Qazaqstanda fýtzal bar ekenin, «Qaırat» sekildi myqty klýb qalyptasqanyn bilip júretin boldy. Klýb prezıdentinen jáne jankúıerlerden keshirim suraımyn. Eger, tóreshi óz mindetin durys atqarǵanda, biz jeńiske jetetin edik», deıdi Kakaý myrza.
Osylaısha, «Qaırat» klýby 11-ret uıymdastyrylǵan ÝEFA kýbogynyń Tórttik fınalyna tarıhta tórtinshi márte shyǵa almady. Degenmen, el chempıondary bul týrnırde eki ret top jarǵanyn aıta keteıik.
Kakaýdyń aıtýynsha, endi «Qaırat» fýtzaldan el chempıonatyna kóńil bólmek. Sondaı-aq, 2018 jyly Slovenııanyń Lıýblıana qalasynda ótetin Eýropa birinshiligine daıyndalady. 30 qańtar men 10 aqpan aralyǵynda tin kári qurlyq dodasynda Qazaqstan quramasy «V» tobynda Reseı jáne Polsha fýtzalshylarymen bir topta synǵa túsedi.
Álı BITО́RE,
«Egemen Qazaqstan»
