Keńestiń mereıtoılyq sessııasyna Qazaqstan, Belarýs, Armenııa, Qyrǵyzstan, Reseı, Tájikstan prezıdentteri qatysýda. Sammıtte atalǵan memleketter basshylary uıym jumysy, halyqaralyq jáne aımaqtyq qaýipsizdiktiń mańyzdy máseleleri talqylanady. Sessııa sońynda mereıtoılyq Deklarasııa qabyldanyp, Ujymdyq qaýipsizdik strategııasyn júzege asyrý boıynsha 2025 jylǵa deıingi naqty sharalar jospary jasalady dep kútilýde.
Bir aıta keterligi, Ujymdyq qaýipsizdik sharty uıymy - halyqaralyq jáne aımaqtyq qaýipsizdikti arttyrý, turaqtylyqty qamtamasyz etý maqsatynda 1992 jyly 15 mamyrda qurylǵan halyqaralyq uıym. Oǵan múshe memleketter arasynda Qazaqstannan basqa Armenııa, О́zbekstan, Qyrǵyzstan, Tájikstan, Reseı, Belarýs memleketteri bar. Bul respýblıkalar arasynda memleketaralyq kelisim - Ujymdyq qaýipsizdik týraly shart jumys isteıdi. Kelisim bes jyl saıyn uzartylyp otyrady.
Ujymdyq qaýipsizdik týraly shartqa qatysýshy memleketter memleketaralyq qatynastarda kúsh qoldanbaýǵa, áskerı odaqtarǵa nemese qandaı da bolmasyn basqa toptastyqtarǵa, sonymen qatar qatysýshy memleketterdiń basqalarǵa baǵyttalǵan áreketterine qatyspaýǵa mindetteme alǵan. Bir nemese birneshe qatysýshy memlekettiń aýmaqtyq tutastyǵyna jáne táýelsizdigi men qaýipsizdigine qater tóngen jaǵdaıda, basqalary birlesken keńes arqyly jumys isteıtin bolady.
Ujymdyq qaýipsizdik týraly shartqa qatysýshy memleketterdiń joǵary saıası organy — Ujymdyq qaýipsizdik keńesi. Onyń quramyna Ujymdyq qaýipsizdik týraly shartqa qatysýshy memleketter basshylary, syrtqy ister mınıstrleri, qorǵanys mınıstrleri jáne Ujymdyq qaýipsizdik keńesiniń Bas hatshysy kiredi.
Esterińizge sala ketsek, keshe Elbasy Nursultan Nazarbaev resmı saparmen Belarýs Respýblıkasynyń astanasy Mınsk qalasyna bardy. Jumys sapary aıasynda ol Belarýs prezıdenti Aleksandr Lýkashenkomen kezdesti. Odan keıin Nursultan Nazarbaev Belarýs Prezıdentimen keńeıtilgen quramda kelissóz júrgizdi. Kelissózderden keıin Nursultan Nazarbaev Aleksandr Lýkashenkomen buqaralyq aqparat quraldary ókilderine brıfıng ótkizdi. Elbasynyń Belarýs memleketine resmı sapary aıasynda Mınsk qalasynda Qazaqstan-Belarýs bıznes-forýmy ótip, arnaıy kórme uıymdastyryldy. Sonymen qatar búgin Mınsk qalasynda Elbasy Qyrǵyzstannyń jańa prezıdenti Sooronbaı Jeenbekovpen kezdesip, shekaradaǵy jaǵdaıdy talqylady. Al búgin Nursultan Nazarbaev Ujymdyq qaýipsizdik týraly shart uıymy Ujymdyq qaýipsizdik keńesiniń mereıtoılyq sessııasyna qatysady dep kútilýde.
Gúlnur QÝANYShBEKQYZY,
"Egemen Qazaqstan"
Mınsk (Belarýs)
